Daini na Ja Chyum Mungga hpe hti sum ru yu ai shaloi e, Lu sha gam ai shaloi hte akyu hpyi ai shaloi galaw ra ai lam ni hpe na chye lu ga ai. Ga shaka dingsa (pru 34) hta Moshe hte David ni lu sha gam ma ai zawn, Yuda masha ni mung laning mi hta mali lang lu sha gam ma ai lam na chye lu ga ai. Shingrai, Lk 4:2 hta ka da ai hte maren, Madu Karai Kasang shi hkum nan mung lu sha gam ai zawn, Shi a kasa ni mung dai zawn lu sha gam ma ai. Raitim mung Hparishe ni gaw masha ni yu htang kaba na matu lu sha gam chye ma ai.

Shiga madat ni e anhte ni a lu sha gam ai lam gaw, myit marin ai lam hpe hkam sharang na, tinang a shut hpyit mara ni a matu dan hkam ai lam hte Madu Yesu a nni nkri yubak lam hta jawm pawng nna ap nawng daw jau na matu rai nga ai hpe dum ra ga ai. Nu wa hpu nau ni e, lu sha gam ai ngu ai gaw, anhte a myit kraw kata hta myit dun nga chye ai, na ai mu ai, hkra ai sama lu ai, nam chyim sama ni lu ai, ndai nam chyim sama ni mahkra hpe n hkam sha hkra, ninghkap shakut galaw sa ai ladat hpe lu sha gam ai ngu ai rai nga ai. Hpa majaw nga yang shinggyim masha gaw mu ai sau ai dwi ai hka ai ndai nam chyim ni hpe myit marin taw nga ai rai yang, kaga hpa hpe mung n lu koi gam nga ai. Dai majaw, ndai myit hpe hkang lu yang sha kaga ni hpe lu hkang na teng sha re.