Karai Kasang, Shi hpan da sai shingra tara (arai ni) hku shaga ai nsen gaw anhte a myit masin hpe jasu ya rit ga.
Hpu nau ni e,
Daini gaw, Karai Kasang anhte shi a kasha ni hpe shaga ai shaloi, hpan da hkrum ai shingra tara (arai ni) anhte hpe gara hku garum nga ai ngu ai hpe jawm myit yu ga.
Masha gaw, “Chye Ningchyang, Hpan Ningsang” ngu ai lachyum hpe chye madat na matu, shingra tara ni hta Shinggyim amyu masha labau tup hka ja nga ai hpe mu lu ga ai.Daini, dai hpan da hkrum sai lam ni hku nna Karai Kasang gara hku shaga nga ai kun, ngu ai hpe hka ja ai shaloi, Wa Karai mung, shi a Tsawra ai Salum hpe anhte hpe madun dan rit ga law.
Chyum mungga daw mi hpe shawng hti yu ga.
Roma ni hpang de shangun ai Laika, daw kaba langai, daw kaji, hkun (1:20) hta ning nga tsun da nga ai:
Shingra tara gaw kaga hpa e mung n jaw ya lu ai simsa ai lam ngai hpe jaw ya lu nga ai. Bum maling ni hpe lung yu ai shaloi, machyi mayan, magra ni a majaw myit n ji na re, lam hkawm bum lung ai majaw hki ba na re.
Raitim, dai shingra tara ni a tsawm htap ai, hkum tsup nna mau na zawn rai Karai Kasang shanhte hpe hpan hpajang da sai hpe mu lu jang, nye a myit masin wenyi a grai sung ai shara ni hpe hkra shangun nna myit hpe jasu ya nga ai.
Anhte, Karai Kasang hpanda ya ai shingra tara ni a lapran pyaw chyai hkawm yu ai aten ni nga na sai: ga shadawn, bum-lang hkan lung hkawm chyai ai, hka kau hkan hka shin, nga hkwi, nga dawn chyai ai, mu ngoi, myi-hkrap gala ai ni hpe yu mau ai, marang prang hkan kagat gasup chyai ai.
Dai zawn re ai aten ni hta tinang a myit kraw hta kaning nga hkam sha yu sai hpe hkring mi sumru yu ga. Dai mahkrum madup ni – tinang hpe Karai nga nga ai lam hpe shadum ya ai kun? Simsa ai lam jaw ya ai kun?
Roma 1:20 hta:
“Shabyin da ai arai ni hpe tau yu yang, ginding aga lat kaw nna shi a marai nsam ngu ai, htani htana atsam hte Karai Kasang shing-yan gaw leng leng adan nga ai”. Shingra tara gaw n mu mada lu ai Karai Kasang a shing-yan hpe anhte kaw shadan dan na matu rai nga ai.
Karai Kasang gaw, shi hpan da sai shingra tara ni hta matut manoi bungli galaw nga ai – anhte a mungkan hta byin nga ai lam mahkra hpe matut manoi up hkang, shading sharai nga ai – ngu ai hpe chyum laika hta asan sha tsun da nga ai.
Shakawn Kungdawn, (174:8-9, 15-18) daw kaba latsa-e-mali-shi-sanit, daw kaji, matsat hte jahku, daw kaji shi-manga kaw nna shi-matsat hpe hti yu ga:
“Shi gaw lamu hpe summwi hte magap da nna,
Lamu ga a matu marang hpe san da nu ai:
Bum ni hta tsingdu shatut da nu ai.
Yamnga ni hte jawp nga ai uhka hkalung ni hpe,
Shahpa jaw nu ai.
Shi gaw ga de shi a ga matsun hpe dat dat nna,
Shi a mungga alawan gat pru nga ai.
Sagu mun zawn, hkyen gumdin shi jahkrat dat nna,
Htat ai hkyen hpe wandap zawn gat dat wu ai.
Shi a sin hpe lungja zawn jahkrat dat nna,
Shi a kashung ai hpe kadai sharang lu na rai nga a ta?
Bai, shi a mungga hpe shi dat dat nna, dai ni hpe shabyawng dat nu ai
Shi a nbung hpe shabung dat nna, hka-shi ni lwi wa ma ai.
Dai majaw, dusat ni lusha sha nga ai hpe anhte mu yang, Karai Kasang gaw malu masha jaw let bau ya nga ai ngu ai hpe anhte dum la lu ai. Dai hte maren, sin, marang, saiwan, namri ni hkrat nna, nlum ta du wa ai shaloi, shanhte yawng byawng hkrat mat wa ai hpe yu nna – Karai Kasang gaw anhte a kata, anhte a makau grupyin e bungli galaw nga ai ngu ai hpe dum chye lu nga ai.
Dai hpan da hkrum ai rai ni anhte hpe tsun dan nga ai nsen ni hpe anhte n na kau ai rai yang, Karai Kasang a nsen hpe anhte n na kau ai rai sai.
Dai the maren, Mahte (6:26-30) daw kaba kru, daw kaji hkun-kru kaw nna sum-shi hta Madu Yesu tsun ai:
“Ntsa malen na u ni hpe yu mu; shanhte n gat n dan ma ai, sutdek hta mung n mahkawng da ma ai: raitimung, sumsing lamu na nanhte a Kawa gaw, shanhte hpe lusha jaw da nga ai: nanhte gaw shanhte hta grau nga myit dai n rai ni?
Nanhte hta kadai raitimung, myit tsang ai hte, tinang a aprat galu u ga, dawng mi daram jat la lu na myit ni?
Bai, hpun palawng a matu nanhte hpa rai myit tsang nga myit ta? Prang na hkalaw pan ni, kaning rai kaba wa ma ai hpe, myit dum nga mu: dai ni gaw, makan mung n galaw, ari mung n ri ma ai: raitimung, ngai nanhte hpe tsun made ai gaw, Shawlumon pyi shi a hpung kaba mahkra hta, dai nampan langai mi zawn, bu hpun lu ai n rai.
Ai n kam ai ni e, daini nga nna hpawt de wanmang hta kabai bang kau ai nam na tsingdu hpe pyi, Karai Kasang shing re jahpun da ai rai jang gaw, dai hta grau nna nanhte hpe jahpun na myit dai, n rai ni?”
Madu Yesu mung, shingra tara hte hpan da hkrum ai arai ni gaw, Karai Kasang a shingra atsam hpe shadan dan, tsun dan nga ai lam anhte hpe sharin ya ai. Pa layang hkan na tsingdu tsingman ni hpe yu nna Karai Kasang a ngang grin ai sadi dung ai lam hpe anhte chye lu ai. Ntsa malen na u ni hpe yu nna, nang hpa lu hpa sha na hpe n tsang ra ai ngu ai hpe shadum ya ai.
Karai Kasang gaw anhte ra nga ai lam ni hpe jaw ya lai wa sai zawn, matut nna mung bau ya nga na ra ai hpe shingra tara ni shadum ya nga ai. Karai Kasang gaw atsam rawng nna anhte hte ani sha nga nga ai hpe shanhte tsun dan nga ma ai. Karai Kasang anhte hpe galoi mung ga shaga nga ai, n-gun jaw nga ai hpe shingra tara ni tsun dan nga ma ai.
Bai, Karai Kasang gaw, nang shi a nsen hpe na lu na matu, ninggawn tawa/lamu hpungtang ngu ai mauhpa lam kaba langai mi hpe mung hpan da ya sai. Nang myo mare kaba hkan nga ai rai tim, kahtawng ningchyawng hkan nga ai rai tim, Karai Kasang hpan da ya ai lamu hpungtang hpe sharawt mada yu nna shi a nsen hpe na la lu mai nga ai.
Shi Kawa a mauhpa lata amu ni hpe nang sharawt mada yu nna, shi nang hpe hpa lam ni hpe chye shangun mayu nga ai kun san yu u.
Akyu Hpyi Ga
- Karai Kasang hpan da ya ai shingra tara ni hpang de pru sa yu u.
- Dai hpan da hkrum ai shingra tara ni hku nna Karai kasang nang hpe hpa lam ni tsun dan mayu ai kun sumru madat yu u. Roma 1:20 hta tsun da ai hpe bai dum ga:
“Shabyin da ai arai ni hpe tau yu yang, ginding aga lat kaw nna shi a marai nsam ngu ai, htani htana atsam hte Karai Kasang shing-yan gaw leng leng adan nga ai”.
- Asim sha nga nna, Shi a simsa ai hta jahkring mi bansa la u.
Yawng, Wa Karai a simani, tsawra ai nsen hpe asan sha na la lu nna, shi a simsa ai hta ban sa la lu myit ga law.
By Cardinal Charles Bo
