Daini na Ja Chyum Mungga hpe hti sumru yu ai shaloi e, kun dinghku ni hta e kashu kasha ni law malawng gaw, kanu hte sha grau ni ni htep htep nga kaba wa ai majaw, kanu ni hte grau nna, masin salum ni htep nga ai ngu lu tsun nga ai. Ma ni mung kanu hte grau ni htep nga chye ma ai. Kanu ni ngu tsun ai hta e shinggyim masha sha n ga dusat dumyeng ni pyi shanhte a kasha ni hkrit hpa tsang hpa n byin hkrum hkra, jam jau ai kaw na lawt lu hkra nga kanu ni shanhte a asak hpe pi ap nawng hkra kasha ni hpe makawp maga lanu lahku chye ma ai.

Ya daini Nu Maria mung shi a kasha hpe n lu hkye la ai raitim, Madu Yesu a nni n kri wudang lam hta nnan kaw na ngut ai ten wudang nhpang kaw du hkra, shi a kasha a makau e nga ya ai rai nga ai. Nu Maria gaw byin mai ai rai yang, shi kasha a malai shi hkum nan she si hkam mayu ai ngu ai myit majing Maria a myit kraw kata hta rawng nga na teng sha rai nga ai. Bai Madu Yesu hku nna mung, shi a kanu Maria hkum nan hkan nang nga ai hpe chye nga ai majaw, myit n gun lu na gaw teng sha rai nga ai. Shingrai daini anhte mung tinang hte tinang a kanu a lapran hta na tsawra myit sumri ni hpe bai sumru hkam sha dinglik yu ga. Anhte yawng sumsing lamu hta nga ai Kanu Maria hpe anhte yu nna kasi la nga ga law.