Anhte shinggyim masha hta e hpan hkum sum hpa nga nga ga ai n rai a ni? Rai yang n kau mi gaw shawng kaw na mung n sa, bai hpang kaw na mung n hkan nang re ai chyahkan hte bung ai masha hpan mi nga ai re. Bai n kau mi rai yang, kaga masha ni hpe galoi e mung kaja ai hku n mu mada chye ai. Galoi e mung mara shagun tsun jahpyak na sha nga chye ai ni wuhpung wuhpawng shagu hta nga nga chye nga ai. Rai yang e tinang gaw kaga masha wa hpe n kaja ai lam lu tsun dat ai shaloi e, na la ai ni gaw kam yang she kam na, lu hkap la yang she hkap la na, dai gaw n jaw n teng na re.

 Kaja sha jaw ai teng ai langai mi gaw, tinang gaw masha ni a n kaja ai lam hpe tsun chye ai wa re ngu ai gaw, shi gaw nang hpe atsawm sha ta tut hta chye mat wa ai re. Lam mi hku tsun ga nga yang e, Myen ga malai hte maren, tinang a lam tinang hkrai sha tsun hpyan dan, tinang a magyi hpe tinang hkrai hpaw lahtum ai nga ai ga malai nan rai nga sai. Dai majaw anhte a n-gup shinglet hpe n lu hting hkang ai rai yang e, madu daw jau shakut nga ai mai kaja lam ni mahkra gaw, zaibru ntsa hka jaw bun ai hpa nga ai hte maren gaman lila byin mat na sha rai nga ai law.