Daini anhte a jawm sumru akyu hpyi ai lamang hta: “Karai Kasang a Nsen Hpe Na Lu ai” ngu ai ga-baw hta mahta nna, jawm sumru yu ga. Karai Kasang a nsen hpe na lu ai ngu ai hte seng nna grau chye na, hkawn hkrang hkra Wa Karai a Wenyi lam woi sharin ya rit ga. Anhte mung shi a chyeju hte hpring nna, shi Kawa kaw kam shamyet nna, shi anhte hpe hpa lam ni tsun dan mayu nga ai kun ngu ai hpe jawm madat yu ga.
Karai Kasang a nsen hpe na lu ai ngu yang, loi myit n gring ai wa zawn nga na re. Raitim, Chyum Laika hte Hkristan Labau ni gaw Karai Kasang Shi a amyusha ni hte matut mahkai, ga shaga ai hpe ra sharawng nga ai lam hpe shadan shaleng ya ai.
Kasa Yawhan ka da ai Kabu Gara Shiga, daw kaba shi-kru, daw kaji, shi-masum (16:13) hta rawng ai hpe madat yu ga:
Karai Kasang gaw anhte hpe ading tawk shaga mayu ai. Kawa gaw shi tsawra ai kasha ni hte shaga ai zawn, anhte hte matut manoi shaga hkat mayu nga ai. Dai majaw mung, shi a kumhpa kaba rai nga ai Chyoi Pra ai Wenyi hpe anhte kaw jaw ya sai. Dai Chyoi Pra ai Wenyi hku nna, anhte, Shi Kawa a Salum de htinglup hting-shang rai lu saga ai. Shi myit ra ai lam hpe chye lu ai, shi a nsen hpe na lu ai, shi a tsawra myit hpe chye chyang nna asak hkrung lu saga ai.
“Dai teng man ai Wenyi du sa jang, shi gaw teng man ai lam yawng mayawng nanhte hpe madun na ra ai: dai wa gaw shi a myit hte tsun na ra ai n rai; na la lu ai made tsun dan na ra ai: htawm hpang de byin na ra ai lam mung, shi nanhte hpe tsun dan na ra ai” nga nna Madu Yesu tsun ai. Nang Hkristan langai teng yang gaw, dai “teng man ai lam a Wenyi” nang kaw du sai.
Karai Kasang, nang hte seng nna hkam sha ai lam hpe dai Wenyi nang hpe tsun dan mayu nga ai. Wa Karai a kup tsup ai, myit mada shara nga ai, mai kaja ai masing ni de nang hpe woi len mayu nga ai (Yeremia 29:11).
Shi a nsen gaw hpring tsup ai, tsawra ai hte hpring ai, galoi mung teng man nga ai. Na a matu kaja dik n re ai de gaw nang hpe n woi sa na re. Nju ndawng ai lam, jeyang dawdan ai lam ni nang hpe galoi n tsun na re. Kasa Yawhan 16:13 hta rawng ai hte maren – Kawa Karai Kasang kaw na shi na la ai hpe sha, nang hpe htawn tsun na ra ai.
Dai majaw, na a prat hpe galai shai shangun ai – Karai Kasang hte ga shaga ai lam hpe na kraw kata de du shang wa shangun u. Karai Kasang hte ga shaga ai ngu ai gaw na prat a matu hpa lachyum pru ai kun ngu ai hpe mung myit yu u.
Na a Hpan Madu gaw, na a daw dan lam ni, kanawn mazum lam ni, bungli bungsi ni, ja gumhpraw lam, nang kadai rai nga ai lam ni mahkra hta garum ya mayu nga ai. Nang Shi hpe grau hkum tsup ai hku chye wa na matu mung, Shi nang hpe grau chye chyap wa na matu mung ra sharawng nga ai.
Myitsu ai kanu kawa ni, tinang a kashu kasha ni hte angwi apyaw rai shaga chyai na hpe ra sharawng ai zawn, na a Kawa Karai mung, Shi a kasha rai nga ai nang hte jahta shaga chyai na ra sharawng nga ai. Karai Kasang nang hpe shaga ai shaloi – nang shi hpe kade daram na lu na ngu ai hta grau nna, nang Shi hpe grau chye chyap wa na hpe ra sharawng nga ai.
Na prat hta Karai Kasang a nsen hpe na lu ai gaw shi hpe kam sham ai ni hpe jaw ya ai chyeju ningsang a apu asi langai mi rai nga ai. Anhte kaga masha ni kadai hte rai tim, shaga ai shaloi tinang madat yang she na lu ai rai nga ai. Dai hte maren, Karai Kasang mung anhte shi hte jahta ai shaloi anhte tsun na hpe mung madat la mayu nga ai.
Hebre masha ni hpang de shagun dat ai Laika, daw kaba, shi-langai, daw kaji kru (11:6) hta tsun da ai:
“Makam masham n rawng yang gaw, shi a man e sharawng awng ai lu la na n rai; kaning rai n me law, Karai Kasang kaw sit shang ai wa gaw, Karai Kasang nga nga ai mung, shi e hkan tam ai ni hpe chyeju htang jaw lu ai mung, kam sham lu na rai nga ai”.
Dai majaw, Karai Kasang nang hpe shaga na matu ala nga ai. Nang hpe shi tsawra myit hte la nga ai hpe kam let shi hpang de sit shang u. Chyoi Pra ai Wenyi mung nang hte Wa Karai hpe matut mahkai ya na ra sharawng nga ai.
Ya, na a myit masin wenyi hpe machyi shim let da nna Wenyi a nsen hpe madat yu u.
Akyu Hpyi Ga
- Asim sha nga nna, Yawhan, shi-kru, kaji shi-masum hpe bai myit dum ga:
“Dai teng man ai Wenyi du sa jang, shi gaw teng man ai lam yawng mayawng nanhte hpe madun na ra ai: dai wa gaw shi a myit hte tsun na ra ai n rai; na la lu ai made tsun dan na ra ai: htawm hpang de byin na ra ai lam mung, shi nanhte hpe tsun dan na ra ai”.
- Karai Kasang a nsen hpe madat yu ga. Ndai ten hta, nang lama ma san mayu, tsun dan mayu ai nga yang mung, nang hta hkrum hkra, byin nga ai manghkang lam ni nga ai rai yang mung, shi hpe tsun dan na aten rai sai. Shi nang hpe gara hku mu ai, hkam sha ai mung san yu u. Shi hpe kam u, shi shaga na aten (shi a aten) hpe ala u.
- Karai Kasang tsun ai lam ni hpe ka matsing buk hta ka da u. Shi tsun ai mai kaja ai lam ni hpe kam u.
Karai Kasang hte anhte shaga ai ngu ai gaw anhte grai hku-hkau ai manang ni hte sa shaga chyai ai hte bung nga ai. Shanhte kaja wa nga ai/n nga ai hpe sa chyan yu ai sha n re; shanhte hte grau hkau-chyap wa na matu rai nna jahta chyai ai gaw de a apu asi rai nga ai.
Karai Kasang hpe grau sung ai hku chye la na matu shakut u. Shi kaja wa nga nga ai hte shi kaja wa shaga nga ai ngu ai hpe kam u.
Yawng, Chyoi Pra ai Wenyi garum ya ai a marang e – Wa Karai hte grau hku hkau, ni htep, tsawra wa lu mu ga law.
By Cardinal Charles Bo
