Shiga madat nu wa ni e, anhte yawng ninghtoi n nga ai asin chyip re ai ten (sh) ningsin chyip re ai shara hpe mu hkrum ga na sai. Dai zawn re hkrum katut wa yang e, shinggyim masha ni hta lata la mai ai lam masum nga nga ai. Dai ni gaw, No.1 hta sin taw nga ai nga nna, aput a ngun nga matsa nga taw chye ai wa re. Bai No.2 ngu na wa gaw, ninghtoi lu hkra tinang hkrai hpa mi mung n galaw yu nna, dai hku sha a la dung taw nga chye ai masha lagawn nan re.

Hpang jahtum na wa gaw, ninghtoi bai lu hkra madu hkrai lama ma mi gaw bai shakut galaw yu dat nna ninghtoi bai lu hkra ladat shaw shakut sa ai. Dai No.3 na masha hpan hte bung ra nga ga ai n rai a ni? Shingrai shiga madat nu wa hpu nau ni e, anhte hkristan ngu ai ni gaw, Madu hkum nan ninghtoi n byin taw shi tim pyi, kaga masha ni hpe ninghtoi gun sa ya ai wa rai ra ga ai. Ninghtoi kaja anhte ni tai ra nga ga ai. Dai re majaw, tinang ninghtoi tai na matu gaw, tinang hkum nan wan hkru amchyi ai hpe hkam jan lu ra ga ai. Shaloi jang she kaga masha wa hpe, ninghtoi jahtoi ya lu ai wa, ninghtoi jaw ya lu ai wa nang byin wa lu na re. Ndai lam hpe sumru yu let madu a prat hta shakut sa ga law.