Ga shaka ningnan hta e Herod masum hpe mu lu ga ai. Ma kaji ni hpe sat kau ai Herod hkaw hkam (Mt 2:16), Yawhan hpe sat ai Herod Antipa (Mk 6: 14-29) hte kasa Yaku hpe sat ai Herod Agripa (Ks 12:2) ni hta ka da nga ai. Daini na chyum mungga hta na wa gaw, kasa Yawhan hpe sat ai wa, Madu Yesu hpe tara jeyang ya ai wa Herod hkawhkam rai nga ai. Nu wa ni ma kaji n kau mi gaw ningsin de n sa gwi ma ai hkrit ai. Bai masha kaba n kau mi mung htoi ai de n sa gwi ma ai.

Hpa majaw nga yang, Shi a shingna gaw shi hpe bai jahkrit na hkrit ai majaw rai nga ai. Masha n kau mi gaw tinang n re yang, n hkam ai nga timmung, n kau mi kaw bai rai jang, wunma kaw bai anyaw hkra la ai, nga ai hte bung chye nga ai. Dai hte maren Herod hkawhkam wa a mabyin gaw, shi shut kau ai mara hpe kaga shut mara langai hte bai magap makoi kau na ngu shakut nga let sha, jaw ai lam n byin wa ai hta sha n-ga, shut mara lahkawng byin mat wa ai rai nga ai. Dai majaw Madu Karai Kasang a shiga hpe na ai shaloi, shi hkrum mayu tim, n gwi hkrum mat nga ai. Shingrai shiga madat nu wa ni, nang ngai lama shut galaw kau dat hkrum yang, gara hku bai matut galaw na i?