Wa Karai gaw, anhte a makam masham a daju ka-ang, tara hku nna sumru chye na matu, shi a salum hpe madun ya rit ga.
Daini na lamang hta, anhte Karai Kasang a nsen hpe madat na la lu hkra myit sumru akyu hpyi ai gaw gara hku garum nga ai hpe jawm sumru yu na ga ai. Ndai myit sumru akyu hpyi ai lam gaw, anhte Hkristan ni a shangwang shinggan de, lam amyu myu a majaw, le taw nga chye nga ai.
Raitim, kaja wa nga yang, myit sumru akyu hpyi ai lam gaw, anhte a makam masham a labau hta daju ka-ang tai hkrat wa sai rai nga sai.
Chyum Laika hpe, Karai Kasang kadai rai nga ai ngu ai hte, shi a mungga hpe sumru yu nna, anhte a prat hpe Karai Kasang a chyeju hte jahpring ya na matu, yaw shada nna, ka da sai rai nga ai.
Ndai Ga-baw a matu Chyum mungga madung hpe madat yu ga.
Shakawn Kungdawng Laika (119:15), daw kaba, latsa-e-shi-jahku, daw kaji, shi-manga hta:
“Na a ga matsun hpe Ngai myit aru nga nna, Na a lam shagu hpe yu nga na nngai” nga nna rawng nga ai.
Chyum mungga daw langai mi hpe anhte sumru yu ai shaloi – ga kaja hte gasau gaw, hkai-li-tum hpe tu kaba wa shangun ai zawn – dai mungga mung anhte a myit masin salum hpe ninggun atsam jaw ya nga ai. Myit sumru akyu hpyi ai shaloi, dai Karai Kasang a mungga nli tum gaw, anhte a myit masin wenyi hta ru jung, tu kaba wa nna, asak hkrung ai asi law law hpe shi shangun nga ai.
Richard Foster ngu ai wa tsun ai,
“Myit sumru akyu hpyi ai a yaw shada lam gaw – Karai Kasang a mungga hpe anhte grau asan sha na la lu na matu re. Anhte a asak hte ninghtoi rai nga ai Hkristu hpe madat ai, hkam sha ai hte madat mara ai rai nga ai. Dai gaw anhte a makam masham a kraw de nan shang nga ai.
Karai Kasang hpe myit dik kabu shangun ai sak hkrung prat ngu ai gaw, nawku hpung a hkan sa tara hkrang hpe hkan shatup ai sha n rai nga ai; Karai Kasang a nsen hpe madat nna shi a Ga hpe madat mara hkan sa na matu rai nga ai. Myit sumru akyu hpyi ai ngu ai gaw dai zawn re ai Hkristan sak hkrung lam de chyinghka hpaw ya ai rai nga ai”.
Hkristan ni sumru akyu hpyi ai shaloi, de a kri madung gaw Karai Kasang a mungga hpe sung sung sumru dinglik yu ai lam rai nga ai. Sumru akyu hpyi ai lam gaw Chyoi Pra ai Wenyi anhte a salum de ading tawk shaga nna, Karai Kasang a mungga hpe anhte a prat hta hkan shadik lu hkra, shara shaman da ai /shara jaw ai lam rai nga ai.
Ga shadawn, Sharung Shayawt Laika (3:22), daw kaba sum-shi-masum, kaji, hkun-lahkawng hta rawng ai –
“Karai Kasang a chyeju a majaw sha, anhte n htum mat ga ai;
Shi a matsan dum ai myit ma mat chye ai n rai” ngu ai mungga hpe anhte sung sung sumru yu ai shaloi, dai shi a ngang grin ai tsawra matsun dum ai hpe anhte kaw madun dan lu lam amyu myu, anhte hpe madun dan/shadan dan na matu shara shaman ya ai ngu ai, asim sha sumru yu ai lam, hpe anhte galaw ga ai.
Dai majaw, myit sumru akyu hpyi ai gaw, Karai a mungga, anhte a myit mang ai lam ni hpe lai di nna, anhte a salum ni hpe galai shai kau lu hkra lam hpaw ya ai.
Bai, Hkristan myit sumru akyu hpyi ai a, atsam rawng ai kaga mu jut langai mi gaw Karai Kasang a laklai ai kumla ni hpe nhting nhtang myit sawn yu ai lam rai nga ai.
Kalang lang, ngai myit mada shara n nga wa ai zawn hkam sha ai shaloi, Karai Kasang jaw da ai ga sadi ni hte seng ai chyum mungga daw ni hpe bai hti sumru yu ai. Dai lam ni hpe sumru dinglik nga let, Karai Kasang a laklai ai atsam ni hpe bai mu, dum wa nna shi hta kam shamyet ai lam hpe bai lu la ai.
Karai Kasang gaw kadai rai nga ai ngu ai hpe anhte myit sumru yu ai gaw – mungkan ga hpe anhte mu mada ai lam hpe mung atsam hte galai shai kau shangun nga ai.
Dai lam a majaw, Shakawn Kungdawn (1:1-3), daw kaba langai, kaji langai kaw nna masum hta ning nga ka da nga ai:
“Tara n lang ai ni a bawng ai hku hta n lawm,
Mara kap ai ni a lam e n tsap,
Jahpoi ai ni a hpawng hta n dung lawm ai sha,
Karai Kasang a tara hta awng nga nna,
Shi a tara hpe shani shana myit mang ai wa gaw, a nga ai.
Dai wa gaw hka kau e hkai ai,
Shi a aten hta asi si nna,
Alap mung n nyip ai hpun hte bung nga ai:
Shi galaw ai yawng mayawng mung tai na ra ai”.
Dai majaw, Chyum mungga hpe hti sumru shaman u. Karai Kasang tsun ai ga hpe na lu na matu shara shaman, aten jaw nna, shi a mungga nli hpe tu kaba wa shangun u. Galai shai ai lam n nga ai, kup tsup ai shi a atsam ningja hpe sawn dinglik sumru yu u.
Myit sumru akyu hpyi ai hpe man man galaw ai a apu asi ngu ai htani htana asak gaw na a rai na ra ai.
Akyu Hpyi Ga
- Nang ra sharawng ai chyum mungga daw, shing n rai, Karai Kasang a laklai ai atsam ningja langai ngai hpe lata nna hti sumru yu u.
- Bai, Shi a mungga/shi a laklai ai tsam ningja langai ngai hpe madung da sumru let, Karai Kasang a nsen hpe na lu hkra shara shaman u/aten la u. Dai Karai a mungga hpe na a prat hta hkan shadik lu hkra Chyoi Pra ai Wenyi kaw garum hpyi u. Karai Kasang a laklai ai tsam ningja gaw na a hkam sha ai lam ni a npawt shadaw tai nga u ga.
Shakawn Kungdawn (119:15) hta rawng ai:
“Na a ga matsun hpe,
Ngai myit aru nga nna,
Na a lam shagu hpe yu nga na nngai” ngu ai hpe bai myit dum ga.
- Na a myit mang, hkam sha, galaw mayu ai lam ni hpe n-gun jaw ai, nang hti sumru sai mungga daw ni hpe, na a ka matsing buk hta ka da u. Na a prat hte na a salum hpe lai shai wa shangun ai Karai a mungga a atsam a majaw Karai Wa hpe chyeju dum shakawn u.
Yawng hpe Wa Karai tutnawng simsa ai hte bau sin makawp maga ya nga u ga law.
By Cardinal Charles Bo