Daini gaw, Karai Kasang a nsen hpe na lu na matu tinang hkrai asim sha nga chye ai a manu hpe jawm hka ja na ga ai. Daini na zawn, garu gachyi nga ai anhte a mungkan hta machyi shim ai (tinang hkrai asim sha nga chye ai) gaw grau ahkyak wa sai.
Karai Kasang a ngwi pyaw ai/simsa ai nsen hpe la lu na matu, anhte mung asim sha nga shaman ra ga ai. Anhte a myit hte salum simsa ai shaloi lu la ai, simsa lam hpe anhte ra ga ai. Tinang hkrai machyi shim ai shara hta sha lu la mai ai, Karai Kasang hte hku hkau kanawn mazum ai lam hpe anhte ra nga ga ai.
Shakawn Kungdawn (46:10), hta Karai Kasang tsun ai: “Amu sha nga mu, ngai Karai Kasang rai nga nngai hpe chye mu” nga nna tsun nga ai.
Solitude ngu ai (tinang hkrai asim sha rai nga ai) gaw: ndai mungkan ntsa na, n rau nhtau, garu kachyi, ru tsang ai lam ni yawng hpe, Karai Kasang a kasha langai mi hku nna, anhte a na hte salum kaw nna gan pat kau nhtawm, Hpan Da Madu a shangwang hta aten la nna simsa ai hte nga mat ai lam rai nga ai.
C. S. Lewis ngu ai wa tsun ai: “Teng sha nga yang, anhte gaw langai hkrai, tinang a matu aten la ai, machyi shim ai lam ni hpe kawsi/hpang gara ai mungkan hta nga nga ga ai: dai majaw, myit sumru ai hte jet ai manang tai ya ai hpe hpang gara nga ga ai”.
Anhte malawng maga gaw, dai “krawsi, hpang gara nga ai” ngu ai hte nga man mat saga ai majaw asim sha nga ai gaw kade ahkyak nga ai ngu ai hpe n dum n chye ga ai. Anhte hkam jan lu hkra madi shadaw ya nga ai Karai Kasang hte “dinghkrai” rai rau nga ai gaw kade ahkyak nga ai, ngu ai hpe n dum n chye nga ga ai. Ndai lam hpe hka ja la nna, shani shagu hkan shadik lu na matu jawm shakut ra ga ai.
Tinang hkrai machyim shim ai hte nga ai hpe anhte ra ai, ngu ai hpe anhte chye lu ga ai; hpa majaw nga yang – Madu Yesu shi hkum nan pyi ra nga ai.
Marku (1:35) hta, Madu Yesu gaw:
“Jahpawt manap jau jau e, nthoi rai nhtoi yang, rawt pru nna, nam na machyi shim ai shara de sa wa nhtawm, dai yang e akyu hpyi nga ai”.
Dinghta ga ntsa e shi a Kawa hte rau n dut n dang langai sha rai nga ai Yesu pyi gaw, shi a Kawa hte rau machyi shim ai hku/machyi shim ai shara hta nga na hpe naw ra nga ai.
Pati poi ni, masha ni hpe tsawra nna, Karai mung rai, masha mung rai nga ai Yesu pyi, shi hkrai asim sha nga na aten hpe ra nga ai. Shi Madu pyi ra ai rai yang, anhte yawng mung teng teng ra nga ga ai.
Shinggyim masha tai wa ai Karai Yesu, shi a yak dik ai magam bungli, dai gaw, Wudang hta si hkam na shawng shana e, Tsanlun sun hta Sumsing Lamu na shi a Kawa hte shim ai shara hta ga shaga lai wa sai. Ndai dinghta ga na shi a magam bungli hpe shangut shakre na matu “machyi shim ai” hpe Yesu ra ai zawn nang, ngai, mung teng sha ra nga ga ai.
Machyi shim ai hku nga ai gaw asak-jaw ai. Hkristan wenyi sak-hkrung lam hta ra nan ra ai. Richard J, Foster tsun ai, “Garen gari hkrum ai gaw kraw kata hta kaman lila hkam sha ai lam re. Machyi shim ai chyawm gaw kraw kata hta hpring tsup ai lam rai nga ai”.
Machyi shim ai gaw wenyi mahkrun a ahkyak dik ai hkan sa tara langai mi rai nga ai. Nang Karai Kasang a nsen hpe na mayu jang, machyi shim ai hpe shaman ra ai.
Na a prat hta kaning re ai masa lam ni hpe rai tim tawt lai lu ai hkam jan lu ai atsam hpe ra jang, machyi shim ai lam hpe shaman ra ai. Na a Tsawra ai Kawa hte machyi shim ai hku aten jaw nna nga na matu Nang hpe hkrang shachyaw da sai.
Machyi shim ai lam hpe kaja dik, gara hku shaman na rai?
Shawng nnan: Myit maju jung ai hpe jahten ya ai n hkrum ai sha, Karai Kasang hte rau nga lu na shara langai mi hpe lata u. Lapran e nang hpe ginjang n jaw lu ai shara hpe tam u. Kaga masha, manang ni hte rau nga ai rai yang, shanhte n nga ai aten, shanhte hkring sa/ yup ai aten hpe lata u.
Lahkawng ngu na hta: Karai Kasang hte asim sha jawm nga na aten ladaw hpe masat u. Minit shi, shing n rai, nayi hkum mi ngu nna masat u. Ndai ladaw laman hta (machyi shim ai lam e woi len ai sha n rai yang), laika hti ai, nawku daw jau ai, akyu hpyi, rosary hti ai zawn re hpe koi u.
Hpa majaw nga yang, Madeleine L’Engle tsun ai, “Karai Kasang hte sung dik ai hku jawm pawng ai gaw, ga shaga ai hta grau nga ai, atsin sha nga ai a wawra hkran de she rai nga ai”. Machyi shim ai gaw Karai Kasang a Hpung shingkang hte ni htep na matu aga hte n tsun ra ai, ningchyun rai nga ai.
Myit galu ga. Karai Kasang hte mung myit galu ga. Kaman nga nna hkam sha ai na a Simsa ai lam a shara hta Karai Kasang a shanu nga ai lam hte jahpring u. Nang gaw shi a tsawra ai kasha rai nga ndai, shi hpan da sai lam mahkra a janmau rai nga ndai. Na Kawa a shalan shabran madi shadaw ya ai lahpum/lahpyen de lung u.
Akyu Hpyi Ga
- Nang hpe dingbai dingna n jaw lu ai shara hpe tam u. Na a myit hte salum hpe shazim ya nna, Karai Kasang hte jawm pawng nga lu hkra garum ya na matu, Chyoi Pra ai Wenyi kaw garum hpyi u.
- Machyim shim ai lam hte Karai kasang hte rau, jawm pawng nga lu hkra aten la, hkring sa u. ( Marku (1:35) hpe bai dum u: “Jahpawt manap jau jau e, nhtoi rai nhtoi yang, Yesu rawt pru nna, nam na machyi shim ai shara de sa wa nhtawm, dai yang e akyu hpyi nga ai”. )
- Machyi shim ai hte nga ai gaw tinang hpe gara hku hkam sha shangun ai kun dinglik yu u. myit n dik ai zawn nga yang mung hpa n ra ai. Asim sha nga shaman ai/ machyi shim ai ngu ai hpe anhte malawng maga n shaman yu ai majaw rai nga ai. Myit galu ga!
Nang law law lang shaman magang, nang grau myit dik wa na ra ai. Akyu hkam sha na ra ai.
Ga n shaga ra ai sha, Karai Kasang a salum hte nang matut hkrup ai shaloi, shi hte man-hkrum rai nna, shi a myiman hpe azi yu ai gaw, na a prat hta ahkyak dik htum ai daw tai wa na ra ai.
Yawng a ntsa Wa Karai a mi-man na nhtoi htoi tu nga u ga law.
