Myitkyina Jau Ginwang, Sasana Ma ni a Mungkan simsa lam a matu Rosary hti akyu hpyi ai hte Jubali shaning masat hkaw tsun ai hpawng lamang hpe Sasana Ma Hpung Committee kawn woi awn nna ( 11, 10, 2025 ) ya shani San Columban Cathedral hta galaw la lu sai.
Mungkan ngwi pyaw simsa wa na matu mungkan ting na ma ni Wan mi Rosary hti akyu hpyi ai ( One Million Children Prayer Service ) lamang hta Myitkyina Jau Ginwang na Sasana Ma ni mung shang lawm ai lam rai nga ai. Ma ni makam masham grau rawt jat galu kaba wa nna Rosary hti akyu hpyi chye wa na hpe mung yaw shada ai.
Jubilee shaning rai nga ai hte maren Sasana ma ni Jubilee shaman chyeju hpe hkam la lu na matu hte Jubilee a lam hpe chye na wa na matu Jubilee hte seng ai hkaw tsun hpawng lamang hpe mung galaw ai.
Ma ni hku nna tinang a manu dan tsawm htap ai ma prat hpe e Karai Kasang hpe daw jau chye ai, sasana magam lam ni hta grau nna shang lawm ap nawng chye ai kashu kasha ni byin tai wa na hte shada da grau hkau chyap wa lu na matu mung yaw shada nna galaw ai re lam hpe Sasana Ma Hpung Committee ningbaw Saranum Rosa Magawng Chyem Hkawn RVA-Kachin Jinghpaw de hpaw tsun dan ai.
Hkaw tsun hpawng hta Wa Jau John Dashi Naw Lawn kawn Jubilee hte seng ai lam tsun dan ai hte Wa Jau Joseph Labang La Htoi ( Don Bosco ) kaw nna Chyoi Pra Ai Wenyi a shaga la ai lam hte seng ai lam ma ni hpe hkaw tsun dan lai wa ai. Hpawng lamang hta jau ginwang kata, lawk shagu na Sasana Ma ni marai ( 411 ) shang lawm lai wa ma ai.
Lamang hta shang lawm ai Sasana ma hpung ni hta na Shy. Magdalena Zinwa Nang Tsawm Pan kawn Simsa a matu anhte Sasana ma ni hku nna Rosary hti akyu hpyi ai lam hpe galaw ai lam re.
Ndai lamang hta shang lawm lu ai majaw ngai hku nna myit kraw salum kaw nna nan grai kabu myit pyaw lu ai. Daini ndai kaw shang lawm nna manaw manang ni law law hte akyu rau hpyi ai, mahkawn ni rau hkawn ai, lu sha ni rau jawm sha ai a marang e anhte shada da grau hkau chyap ni htep hkat wa ai ngu nna myit hta hkam sha ai. Ndai lam gaw grai nan kaja ai lam rai nga ai.
Daini na hkaw tsun hpawng hta daining gaw san seng chyoi pra ai Jubilee shaning re ai hte maren Jubilee ngu ai gaw anhte a matu kade daram ahkyak nga ai, Jubilee gaw galoi hpaw hpang nna gara hku nna byin hpang wa ai lam ni hpe tsun dan ai majaw Jubilee a lam hpe atsawm chye la lu ai hte anhte a makam masham hpe mung sharawt shajat ya ai lam hkam la lu ai majaw sharin ya sai wa jau yan hte Holy Childhood woi awn committee ni hpe grai chyeju dum ai. Hpang de mung ndai zawn re ai lamang ni law law galaw ya nna anhte a makam masham lam grau rawt jat wa hkra sharin ya mi ngu tsun mayu ai.
Ya shara shagu hkan nga taw ai tsawra ai ramma manaw manang ni hte kanu kawa ni hpe mung ngai hku nna tsun mayu ai lam gaw ya aten shara shagu majan byin taw nna tsin yam tsin dam hkrum taw ai ni grai law nga ai. Dai re majaw anhte hku nna dang di dang dep ai daram lu garum ai ni mung garum la na, hpa n lu garum ai raitim Rosary hti akyu hpyi shaja let mungdan ngwi pyaw simsa wa na matu akyu hpyi ga ngu saw shaga mayu ai nga nna tsun dan lai wa ai.
Shadang Paul Dashi Zau Hkun Du kaw nna mung daini ndai lamang hta shang lawm lu ai majaw grai pyaw ai, Jubilee ngu ai hpe na yu ai raitim Jubilee a lam hpe n chye ai, daini wa jau tsun dan ai majaw Jubilee a lam grai myit lawm ai hku chye la lu ai.
Tsawra ai manaw manang ni hpe tsun ai mayu ai gaw ndai zawn sharin hpawng, hkaw tsun hpawng ni galaw ya ai shaloi yawng n lagawn ai sha sa lawm ga, sharin hpawng hta tsun dan ai ni yawng gaw anhte a matu grai akyu rawng ai lam ni hkrai rai nga ai. Bai nna ya aten anhte a mungdan n simsa ai majaw mungdan simsa wa lu na matu ndai zawn lamang nga ai shaloi sha nrai na galoi mung akyu hpyi nga ga. Anhte ma ni a akyu hpyi nsen hpe Karai Kasang galoi mung madat nga ai nga nna tsun manaw manang ni hpe saw shaga tsun dan lai wa ai.
Akyu hpyi lamang hta shang lawm ai ma ni a tsun shapraw dan ai nsen hte lamnag galaw ai yaw shada hpe Sasana Ma hpung Komiti ningbaw rai nga ai Saranum Rosa Magawng Chyem Hkawn kaw nna hkum tsup ai hku tsun dan nga ai.
Myitkyina Saradaw Sasana hta jau ginwang ( 33 ) nga ai rai nna jau ginwang shagu ( One Million Children Prayer Service ) hta shang lawm ai akyu hpyi lamang hpe galaw nga ai re.
