Nni nkri hkrum nga ai wa a hkrap ngu hkrap ngoi nsen gaw anhte a na de du shang wa ai. Ngai gaw shanhte hpang de nye a myit masin hpe hpaw dan nna shanhte a ru yak tsin yam tsin dam lam ni hpe shayawm kau na matu, garum ya na matu shakut nga ai kun? Hten run mat ai dinghku, dam mat ai ramma, hten za mat ai ma ni hkrap ngu hkrap ngoi nsen ni gaw anhte a na de du shang wa ai. Anhte mai byin ai lam ni hku nna shanhte a matu akyu hpyi ya let e garum shingtau ya nga ai kun? Anhte a makau grup yin hta roi rip ai hpe hkrum sha ai, n tara ai hku nna dip kamyet ai hpe hkrum sha nga ai, machyi makaw hte myit ru myit tsang hkrum sha nga ai ni a myi prwi hpe anhte mu ya nna katsut ya nga ai kun?

Shanhte ni hpe shalan shabran ya na matu, garum shingtau na matu tinang hkum hpe sha myit maju jung ai, tinang hkum hpe sha manu shadan ai prat kaw nna pru sa wa na matu shakut nga ai kun? Daini anhte a mungkan hte anhte a mungdan hta dai zawn re ai lam ni law law byin nga ai hte hkrum sha nga ma ai. Shanhte hpe ta tut magam bungli ni hku nna n lu garum ai raitim shanhte a matu n hkring n sa akyu hpyi ya ai lam gaw shanhte hpe garum shingtau ai lam rai nga ai.