Daini gaw, anhte Karai Kasang hpe tsaw ra ai myit hpe jasu na matu, Karai Kasang gaw anhte a sak hkrung lam ni hta anga nga ai ngu ai hpe maju jung nna jawm sumru yu ga.
Nang kanang e nga tim, hpa mi galaw nga ai rai tim, Karai Kasang gaw nang hte dingyang anga nga ai. Shi anhte hte ni htep, rau shanu nga ai gaw anhte shi a amyusha ni asak hkrung hkawm sa nga ai lam a ningpawt ninghpangrai nga ai.
Karai Kasang shi a amyusha ni a ntsa tawn da ai tsaw ra myit hpe myihtoi Zehpania hta ka da ai daram hkum tsup ai hpe Chyum Laika Buk ting pawng yang pyi n mu lu ai.
Zehpania, Daw kaba masum, kaji shi-sanit (3:17) hta ning nga tsun da nga ai:
“Na a Karai Kasang gaw, na a ka-ang e rai nga ai;
Shi gaw daru magam rawng nna, hkye hkrang la na ra ai:
Na a lam shi kabu gara nna, sharawng awng na ra ai;
Shi gaw tsawra nna, atsin sha rai nga ai: mahkawn mangwi let,
Shi nang hta myit kabu nga na ra ai”.
Ndai chyumg mungga hpe daw hte daw jawm sumru yu ga:
Shawng nnan, “Karai Kasang gaw nanhte a ka-ang e shanu nga ai” ngu ai hpe myit yu ga:
Ndai teng ai lam hpe sumru yu ga. Shi gaw tsan ai shara kaw n nga ai, ya ya nan, nang hte rau nga nga ai. Nang Hkristan rai yang gaw, shi a Wenyi, na a kata hta shanu nga nna, na a wenyi hte rau kanawn mazum nga ai.
Shakawn Kungdawn, (139:7) hta tsun da ai:
“Na a Wenyi hte ngai kanang e hka lu na n hka? Na a myi man kaw na kade hprawng lu na ma?”
Bai, Lahkawng ngu na hta: Karai Kasang gaw “Daru magam rawng nna, hkye hkrang la na ra ai”. Hkristan langai mi hku nna, na a atsam hte na a hkum hpe nang hkye la ai n re; tinang hkum hpe shagrit shanem nna tsaw ra ai Yesu a hkungga hku nna sha hkyela hkrum nit dai.
Hkristu hta kam sham ai lam hpe nang hkam la da sai rai yang, nang gaw shi hte prat tup seng nga sai rai nna, na a hkye hkrang la ai lam hpe hpa e mung n kashun la kau ya lu ai. Dai majaw Shi Madu nang hta kabu gara nga ai.
Masum ngu na daw hta: “Na a lam shi kabu gara nna, sharawng awng na ra ai.”
“Na a lam shi kabu gara na ra ai ngu ai” gaw, “nang kadai re” ngu ai hta shi kabu nga na hpe tsun mayu ai. Karai Kasng nang hta kabu nga ai hpe kam nni?
Mungkan mahtang gaw, nang hta kabu shara hpa mung n nga ai, nga nna nang kam hkra ginlawm nga ai. Na a hpyen wa gaw – nang galaw shut ai lam ni hpe madi madun nna nang gaw tsaw ra hkrum na n gyin ai, hpa manu n rawng, n gying dan ai masha rai ndai ngu nna nang hpe mara shagun shingtsang nga ai.
Raitim, chyum laika hta gaw: Karai Kasang gaw “na a lam shi kabu gara nna, sharawng awng na ra ai” nga nna tsun da nga ai. Karai Wa gaw Shi a Kasha Yesu si hkam na daram nang gyingdan nga ai hpe mu ai. Dai hpe hpa lam e mung n la kau ya lu nga ai. Nang hta shi kabu gara nga ai.
Mali ngu na hta: “Karai Kasang gaw Shi a tsawra ai hte anhte hpe atsin sha nga shangun nga ai.”
Ndai gaw shi a ga sadi re; raitim, anhte maga hku nna hkap la ya ra ai. Shi myit ra sharawng ai gaw myit ru myit tsang hkiba hkrum nga ai na a prat de machyi shim ai simsa lam hpe woi bang ya mayu nga ai. Na a salum hpe shi kaw ap ya nna, shi a shanu ningngai nga ai hte jahpring la mayu ai rai yang, shi a simsa ai gaw na a matu galoi mung shajin da nga ai.
Manga ngu na lam hta: Bai Karai Wa gaw “Mahkawn mangwi let, nang hta myit gabu nga na ra ai”.
Kabu gara ai ngu ai gaw awng dang ai a apu asi rai nga ai. Karai Kasang shinggyim masha hpe hpan da ai a yaw shada lam gaw – shi hte tsawra ginlung kahkyin hku hkau nga na matu rai nga ai.
Raitim, shinggyim masha mahtang, shut hpyit mara hpe lata la kau ai shaloi, dai kanawn mazaum hku hkau ai lam hpe Karai Kasang shamat kau sai.
Yesu si hkam ai shaloi, dai dagam dala hpe agrawp kau ya sai, anhte a mara dan a matu hka hpe wa kau ya sai. Karai Kasang hte anhte a lapran shada tsawra ginlung kahkyin ai hpe bai lu la sai. Dai gaw Karai Kasang a matu awngdang lam rai nga ai. Dai awng dang ai magam bungli a majaw Karai Kasang gaw kabu gara let, mahkawn mangwi nga ai.
Akyu Hpyi Ga
- “Karai Kasang gaw anhte a ka-ang e nga nga ai” ngu ai hpe myit sumru ga.
Pru Mat Wa ai Laika 33:14 hta:
“Ngai hkum nan sa nna nang hpe shalan shabran na de ai” nga nna rawng nga ai.
- “Shi gaw tsawra ai hte nang hpe atsin sha nga shangun na ra ai” (Zehpania 3:1) hpe sumru ga.
- Chyum Mungga a tengman ai hpe na a salum de sung sung du shang shangun u. Na a Kawa gaw nang a marang e mahkawn hkawn let kabu gara nga ai. Shi a myi hta nang gaw shi a “awng dang lam” rai nga ai.
Wa Karai nanhte yawng a ka-ang e, tut e shanu ningngai nga let ngwi pyaw simsa ai hpe jaw ya nga u ga law!
By Chardinal Charles Bo
