Kahtawlik htunghking hta shinggyim ahkaw ahkang hpe makawp maga ai hte lit ni hpe gun hpai ai rai yang she shinggyim sari sadang hpe makawp maga lu nna, hkam kaja ai wuhpung wuhpawng hpe lu la mai ai lam sharin ya nga ai. Dai majaw, masha shagu hta asak hkrung lam a npawt nhpang ahkaw ahkang hte shinggyim sari sadang a matu ra kadawn ai lam ni hpe lu la na ahkaw ahkang nga ai. Ndai ahkaw ahkang ni hte htap htuk ai gaw lit la ai lam rai nga ai, langai the langai, anhte a dinghku ni hta, shinggyim wuhpawng kaba ni a matu.
Chyum daw
Jaw Jau 25:35 Marai langai ngai matsan mayan hkrum ai shaloi, anhte hta karum na lit nga ai.
Ruhta 2:2-23 Bua gaw gaida jan hte maigan num Ruhta hpe yu lanu lahku nna, tara hta tsun da ai hta grau nna jaw ai.
Ga Shagawp 31:8-9. Ra kadawn nga ai ni a malai tsun shaga na matu n-gup hpaw u.
Esaia 1:16-17 Tara rap ra lam hpe tam mu, dip gamyet sha hkrum ai ni hpe hkye la mu, jahkrai nmai ni hpe makawp maga mu, gaida jan a matu hpyi nem nga mu.
Yeremia 22: 13-16. Tara shang asuya gaw matsan mayan ni hte n-gun kya ai ni a ahkaw ahkang hpe makawp maga ya ra ai.
Mahte 25: 31-46 Ndai ni hta na kaji htum ai wa hpe nanhte galaw myit dai hte maren, ngai hpe mung galaw myit dai.
Luka 16:19-31 Sut su ai wa gaw Lazaru hpe bau maka na lit nga ai.
2 Korinhtu 9:6-15. Karai Kasang a kumhpa ni hpe garan gachyan na matu jaw da ai.
Yaku 2:14-18 Magam bungli n lawm ai makam masham gaw chyasi rai nga ai.
Nawku hpung a Labau hkringhtawng the wa sarabyin ni a Ahkaw ahkang hte lit magam ni hte seng nna sharin shaga ai laika n kau ni
“Tatut hta shinggyim ahkaw ahkang gaw yawng a matu maren mara n re ai hpe dan dawng ai hku mu lu nga ai. Dai ahkaw ahkang ni hpe hkungga ai lam gaw mungdan langai a shinggyim nga pra masa hte sut masa rawt jat galu kaba wa na matu shawng nnan na masa rai nga ai.’ Raitim, ‘anhte a dai ni na shinggyim wuhpawng ni hpe atsawm sha yu yang, lai wa sai shaning sanit shi ning daram hta shinggyim masha yawng a rap ra ai sari sadang hpe teng sha masat masa galaw, hkungga lara ai, makawp maga ai hte n-gun jaw ai lam law law nga ai kun ngu ai hpe myit yu shangun nga ai. Shinggyim masha ni hpe zingri zingrat, kabai kau ai, sat kau na matu pyi n htingnut ai akyu hkam sha lam hpe madung tawn ai sut masa hkrang masa hku nna lusha jaw sha nga ai. shinggyim masha a shangai chyinghkai ai sari sadang hta madung tawn ai kun?” (Wa Sarabyin Francis, Hpunau tsawra myit hte shinggyim kanawn mazum lam [Fratelli Tutti], No. 22)
“Anhte gaw shinggyim masha a ahkaw ahkang hpe tsun ra ai. Masha gaw asak hkrung na ahkaw ahkang nga ai. Shi gaw hkum hkrang san seng ai lam hte prat hpe hkrak hkra rawt jat galu kaba wa na matu ra kadawn ai arung arai ni hpe lu la na ahkaw ahkang nga ai, grau nna malu masha, bu hpun palawng, nta, tsi tsi hkam la ai lam, hkring sa ai lam, hte, hpang jahtum, ra kadawn ai shinggyim nga pra masa lam ni hpe lu la na ahkaw ahkang nga ai. Dai majaw, shi gaw shi a hkamja lam hpe n-gun jaw na ahkaw ahkang nga ai; gaida jan tai ai; asak kaba ai aten; (San Yawhan XXIII, Mungkan Ntsa Ngwi Pyaw Simsa Lam [Pacem in Terris], No. 11)
“Shinggyim shinggyim wuhpawng hta masha langai a shingra tara ahkaw ahkang gaw kaga masha ni hta dai hte maren lit nga ai hpe madun ya ai; dai lit gaw, dai ahkaw ahkang hpe masat masa galaw nna hkungga lara ai lam rai nga ai. Madung shinggyim ahkaw ahkang shagu gaw shi a ahkaw ahkang atsam hpe shingra tara kaw na lu la ai, dai tara gaw shi hpe jaw ya nna, shi a lit ni hpe n gawn n sawn di kau ya ai. dai ni hpe daw mi shadik shatup ai gaw, lata langai mi hte nta gap nna, lata langai mi hte jahten kau ai hte bung nga ai.” (San Yawhan XXIII, Mungkan Ntsa Ngwi Pyaw Simsa Lam [Pacem in Terris], No. 30)
“Mungdan langai hpe yu yang . . . mung shawa yawng a ahkaw ahkang hpe makawp maga na lit mung nga ai, grau nna gawng kya ai mung masha ni, bungli galaw masha ni, num ni hte ma ni a ahkaw ahkang hpe makawp maga na lit mung nga ai. Mungdan gaw bungli galaw masha a masa hpe grau kaja hkra galaw na lit hpe koi gam ai gaw galoi mung n mai byin ai.” (Yawhan XXIII, Hkristan makam masham hte shinggyim nga pra masa rawt jat galu kaba wa lam [Mater et Magistra], No. 20)