Wa Sarabyin Leo XIV gaw, San Pra ai masha nnan marai sanit hpe san pra ai masha shatai ai Missa hkungga hta, Hkristan ni gaw, chyam dinglik lam ni, tsin-yam tsindam ni hpe hkrum sha nga ai aten hta pyi, Karai Kasang hpe myit masin mahkra hte kam sham ai myit hte akyu hpyi ra ai lam hpe shadum ya nga ai.
San Petru Square hta Missa hkungga hta, Wa Sarabyin gaw ndai ‘a’ lu ai’ marai sanit hpe Kahtawlik Nawku Hpung hta San Pra ai masha masat tang ndau shabra dat sai. Dai marai sanit gaw Ignatius Choukrallah Maloyan, Peter To Rot, Vincenza Maria Poloni, Maria del Monte Carmelo Rendiles Martínez, Maria Troncatti, José Gregorio Hernández Cisneros, hte Bartolo Longo ni rai nga ma ai.
Wa Sarabyin Leo XIV gaw Hkristu bai du sa ai shaloi mungkan ga hta makam masham hpe mu lu na kun ngu ai Yesu a ga san hpe myit sumru yu ai. Makam masham gaw Karai Kasang hte Shi a amyu masha ni a lapran ahkyak ai tsawra myit sumri re ai hpe ahkyak shatai tsun dan ai. Wa Sarabyin gaw, shanhte a makam masham hpe hkrung nga shangun nna, mungkan a matu Hkristu a nhtoi tai wa ai, San Pra ai masha nnan marai (7) a kasi ningli hpe madi madun dan ai.
Arung aria, htung hking hte awng dang lam ni a manu hpe lu la tim, makam masham n nga yang, dai ni a tengman ai lam a lachyum hpe sum mat ai ngu ai hpe madi madun da nga ai. Makam masham n nga ai mungkan gaw myit mada shara n nga ai (sh) kawa ngu ai karai kasang a lachyum gaw mat mat na re, nga nna tsun ai.
Wa Sarabyin gaw, makam masham hpe madi shadaw ya ai Karai Kasang hte matut mahkai lam hpe ngang kang shangun ai majaw, matut manoi akyu hpyi na matu tsun shadut da nga ai. Akyu hpyi ai hta byin chye ai gunglau lam lahkawng hpe sadi jaw ai: n hkru n kaja ai lam ni hpe hkrum katut ai shaloi myit daw myit hten ai hte akyu hpyi ai hpe Karai Kasang hpe hkang lu ai ngu hkam la ai lam rai nga ai.
De a malai, grau nna tsin-yam tsindam hkrum ai shaloi, Karai Kasang hpe kam hpa na matu n-gun jaw ai, anhte a chyam dinglik lam ni hta Hkristu anhte hte rau nga nga ai hpe shadum ya ai. Hpang jahtum hta, Hkristan ni hpe makam masham hte hkum tsup hkra sak hkrung hkawm sa na matu saw shaga ai, dai gaw anhte galaw sa wa ai lam hte myit mada lam hpe lam madun ya nga ai. Ga ntsa na makam masham gaw sumsing lamu a myit mada lam hpe shabyin ya ai zawn, San Pra ai masha nnan ni mung chyoi pra ai lam hpe hkan shachyut na matu karum ya na matu akyu hpyi garum ya nga ma ai.