Sadi maja ai ngu ai gaw, jan mat ai lam n nga ai. Ndai ga hpe masha shagu na ga sai rai na re. Hpa majaw nga yang, sha sadi, hkawm sa tsun shaga ai lam ni mahkra hpe sadi na ra nga ai zawn, tinang a wenyi lam yan hta e mung, tut nawng gram lajang let sadi maja nga nna sak hkrung nga sa na ra nga ai. Karai Kasang jaw ai shani shagu na sak prat hpe san seng ai hte nga sa nna, du sa ra ai Madu Karai hpe shagrit shanem ai hte a la nga na ra ga ai. Nanhte ni gaw shingkyit kyit n na, wan pyending ni hpe shachyi da mu nga (Lk 12:35) hta ka da ai.

Shingkyit kyit ai ngu ai gaw, Tinang a myit kraw kata ra nga ai lam ni hpe hkyen lajang nna, ninghtoi hpe jaw ya ai pyending gaw anhte a hkristan prat hta ra ai mai kaja ai lam ni hpe hkan tam hkan sa shakut na hpe n’gun jaw da nga ai. Madu Yesu gaw nanhte gaw mungkan a ninghtoi hte Jum rai nga myit dai ngu tsun ai. Anhte ni Madu Yesu hte hkrum lu na matu a la nga let, mungkan a matu ninghtoi tai ya lu ai ni byin na matu ra nga ga ai. Shingrai maga mi hku nga yang, tinang a prat hpe masha ni a matu hte tinang a matu mung, hpring zup hkra sak hkrung nga sa ai gaw Madu Karai hpe atsam marai dat let jin jin ala nga ai lam mung rai nga ai.