Madu Karai Kasang gaw simsa lam hpe n rai, shada da hka bra na lam hpe gun sa wa ai ngu tsun da nga ai. Simsa lam a Madu, si mani ai salum madu, matsan dum lama ai hte hpring ai Karai Kasang gaw, hpa majaw simsa lam n rai, hka bra ginhka ai myit masa ni hpe la sa ya wa a ta? Bai Madu Yesu tsun ai gaw shi hta dum nta masha ni hpe grau tsawra ai wa gaw, shi madu hte n grin nga ai nga nna asan sha tsun da sai. Madu a hpang hkan na wa gaw, ngang grin ai, dawdan gwi lam nga ra ai. Dai gaw Karai a hpang hkan ai ni sak jaw ap nawng daw jau ai lam hta n loi la nga ai hpe madi madun ya sai re.

Ya anhte Karai Kasang hpe tsawra nna, shi a hpang hkan na matu ra wa yang, ndai mungkan hta nga ai a rung a rai ni mahkra gaw, no.2 hta sha nga nga ai ngu ai hpe shi tsun dan nga ai. Madu Karai gaw, wan zawn grung ai ngang kang ai myit jasat hte hpring zup ai wa nan re. Shi a myit masa gaw gau ngwi, bai katsi mung n katsi, kahtet mung n kahtet re ai ka ang hpat wat myit ja sat n re. Dai majaw shi madu a saw shaga ai hpe gwi gwi, tawk hprut dawdan nna, Karai Kasang hte n htan shai ai lam mahkra hpe myit marin lam n nga ai sha kabai tawn kau chye na matu shi anhte yawng hpe ja ja saw shaga nga ai law.