Hpaji byeng ya gaw, asak hkrung lam a matu ahkyak dik ai Zaw kaba nan re. Ndai mungkan ntsa hta e, du hkra ladaw hte shingra mabyin masa lam ni gaw, shi aten hte shi aten man man gayin taw nga ai. Dusat du myeng ni a shamu shamawt sak hkrung hkawm sa ai, galai shai wa ai mabyin ni hpe mung chye da ra ga ai. Ya daini chyum mungga hta, Madu Karai Kasang gaw, mungkan a shingra mabyin hpe chye na nna, tinang a wenyi hkrun lam a matu galai shai la ra ai mabyin hpe n chye shi ai ni hpe shadum nga ai.

Anhte shinggyim masha ni gaw sak hkrung ai ni rai nga tim, wenyi hte hkum hkrang lu ai ni rai ga ai. Dai re majaw hkum hkrang gaw lani mi hta hten za mat na rai nga tim, n si chye ai wenyi sak hkrung lam matu madung da shakut sa ra nga ga ai. Wenyi sak hkrung lam a matu ra nga ai hpe sadi let n lu hkan shakut kau ai rai yang manghkang lam hta hkawm sa taw ai wa nan re. Kalang lang anhte shiggyim masha ni gaw, mungdan lam, lusut lusu nga mai lam, hpaga lam shinggyim kanawn mazum lam ni hpe chyu sha tsun chye nga ga ai. Raitim mung wenyi lam a manghkang hpe gaw ndum shai rai nga chye ga ai majaw, Madu Karai gaw tinang a wenyi lam yan hpe mung dum let shakut sa na matu n gun jaw da nga ai law.