( God Heals Our Hearts )
Shakawn Kungdawn Laika (147:3) hta: “Myit maku daw ai ni hpe shi shamai ya nna, Shanhte a nma hpe ahkang kayawp ya mu ai”nga nna ka da nga ai.Daini na myit sumru akyu hpyi lamang hta, Karai Kasang anhte a Salum ni hpe Shamai Shatsai Ya ai ngu ai hpe jawm dinglik yu ga.
Shakawn Kungdawn daw kaba ( 147 ) hpe hti yu ai shaloi, Karai Kasang galaw ai lata amu ni law law lawm nga nna, shi hpe anhte tsawra mayu ai myit hpe jasu ya ai.
Shi gaw “shagan ni hpe nambat jaw nna, langai hte langai hpe amying shamying ya u ai”;
“Lamu hpe summwi hte magap da nna, lamu ga a matu marang hpe san da nu ai”;
“Bum ni hta tsingdu shatut da nu ai”;
“Yamnga ni hte jawp nga ai hkalung ni hpe, shahpa jaw mu ai” nga nna Wa Karai a lata amu magam ni hpe shingran pra pra ka da nga ai.
Anhte jawm sumru yu na ga-baw hte seng nna, daw kaji masum (3) hpe la ga. Dai gaw, “Myit maku daw ai ni hpe shi shamai ya nna, Shanhte a nma hpe ahkang kayawp ya mu ai” ngu ai rai nga ai.
Yesu gaw dai amu hpe galaw na Krai Kasang a tsawra ai salum a kaja dik ai kasi rai sai. Shi a Sasana Magam lam ding-yang hta, shi a makau na ni hpe shanhte a hkum hkrang, myit masin, wenyi ningma ni hta shamai shatsai ya lai wa sai. Chyum laika hta Maria Madalena hte Pawlu hpe anhte ga shadawn hku mu lu ga ai.
Yesu gaw, Maria Madalena kaw kap nga ai nat hpe shaden kau ya nhtawm Shi Madu hte ni htep ai manang shatai da sai. Shi a hkumhkrang, myit masin, wenyi hpe shamai shatsai ya sai.
Dai hpang, Pawlu hpe mung shamai shatsai ya sai. Pawlu gaw Madu Yesu shi hpe rai n shadan dan yang, Sawlu mying hte grai chye chyang, awng dang nna rai dum ai myit rawng ai wa rai nga ai. Shi a makam masham a matu grai magrau grang nna tara shadik ai wa mung rai nga ai.
Raitim, shi gaw Karai Kasang a salum hte tsan ai wa rai nga ai. Hkristan ni a shamu shamawt ai lam hpe ru kaw nna gawt kau na matu shakut lai wa sai.
Yesu hte hkrum nna shamai shatsai ya hkrum ai kaw nna,
“Kaja wa nye a Madu Hkristu Yesu a chye chyang ai lam a chyahtum chyalai re ai jaw e, yawng mayawng sum mat ai lam arai nga ai, ngai nawn nga nngai” nga nna hkam la wu ai.
Karai Kasang gaw, Maria Madalena hte Pawlu yan a matu tsawra myit nga ai zawn na a matu mung nga nga ai. Masha ni, mabyin masa hte mara a majaw nang hta kap nga ai wunma ni hpe shi chye ya nga ai.
Shi na a matu lajang da ya ai nhpaw n-ya asak hpe nang hkam la lu na lam hpe pat shingdang da ai – na a shakut shaja lam ni, dan di kau n lu ai n kaja ai kyang lailai hte ya-kap mat ai lam ni hpe Karai Kasang chye ya nga ai.
Dai wunma ni hpe Karai Kasang shamai shatsai ya mayu ai; shi hta masing mung nga ai. Ya jang pyi shi nang hpe shamai shatsai ya mayu nga ai. Shi a tsawra ai hte shaman chyeju ni hpe nang hkam la na shi ra sharawng nga ai.
Maria Madalena hte Pawlu zawn nang mung prat galai shai nna nhpaw n-ya asak hkam la na shi ra sharawng nga ai. Chyoi Pra ai Wenyi woi len ai hpe hkam la nna hkan nang sanu.
- Na a prat hkrun lam, kaning re ai shara hta rai tim, machyi nga ai wunma ni hpe Karai Kasang shamai ya mayu nga ai hpe kam nna sumru u.
“Myit maku daw ai ni hpe shi shamai ya nna, Shanhte a nma hpe ahkang kayawp ya mu ai”. (Shakawn Kungdawn 147:3)
- Na a salum kata hta machyi nga ai wunma ni hpe Karai Kasang hpe tsun dan u. Ma kaji prat hta byin sai lam mung mai byin ai zawn, mani mana sha byin ai lam ni mung mai byin ai. Hpa majaw mi rai rai, Karai Kasang gaw dai wunma ni hpe shamai ya mayu nga ai.
“Yawe Karai Kasang e, ngai hpe shamai ya e, shaloi ngai mai wa na nngai; ngai hpe hkye hkrang la e, shaloi ngai hkye hkrang la ai hkrum na nngai: nang gaw nye a shakawn kungdawn shara rai nga ndai” ngu nna Yeremia zawn akyu hpyi u. (Yeremia 17:1)
- Karai Kasang nang hpe woi ai de hkan nang u. Kalang lang, shamai shatsai ai gaw kaga masha ni hpe mara dat ya ai, shada ga tsun jahta chyai ai, aten loi grau la nna Karai Kasang hte rau ga shaga, akyu hpyi ai lam ni hku nna byin nga ai.
Na a lai wa sai ten na wunma ni, hten za mat ai hku hkau kanawn mazum lam ni, bai kahtap galaw law re ai shut hpyit mara ni hte seng nna Karai Kasang nang hpe kaning nga tsun ai kun? Nang na la ai lam ni hpe ka matsing da u.
Shamai shatsai ai gaw ning-gam hte ning-gam byin chye nga ai. Nang hpe shut ai wa hte nang ga-ja shaga nna tsun hkat nhtawm mara dat ya yang mung, mai kaja nga ai. Ya aten, yak nna n ngwi n pyaw tim shada mara dat ya hkat ai hpang de gaw myit ngwi simsa ai lu na re.
Nang hpe shut ai wa lama si mat sai rai yang mung, shi hpe ya mara dat ya u. Nang hkam sha nga ai wunma hpe shamai ya ai gaw Karai Kasang rai nga ai. Ya jang, nang hta mai tsai ai hte galai shai ai lam ni kalang-ta du shang wa na ra ai.
Tsawra matsan dum ai lam mahkra a Madu, Wa Karai Kasang, nanhte hkam sha nga ai machyi makaw wunma ni yawng hpe shamai shatsai ya nna, Asak Ningnan jaw ya u ga law.
By Cardinal Charles Bo
