We Chat Online kaw nna San Petru Kahtawlik Online Akyu hpyi hte RVA Kachin Service We Chat group hpaw hpang ai (10) hpring chyeju dum Misa hkungga hte shagrau lamang hpe 25 October 2025 ya shani San Columban Cathedral Nawku Jawng hta 10:00am hta galaw lai wa sai.
Ndai chyeju dum Misa hkungga hta Myitkyina Saradaw Sasana lit hkam Sagurem wa, Wa Saradaw John Mung Ngawn La Sam, Wa Jau Dr. Bernard Dashi Tang Ji, Wa John Galang La Raw, Wa Jau Dr.Joseph Gawlu Yung Wa, Wa Jau Gregory Lazum Naw Din, Wa Jau Paul Wanghte Lum Dau, Wa Jau Paul Kinsa Tu Awng, Wa Jau Joseph N shang Hku Ja Yaw, Wa Jau Joseph Soe Yan Aung, Wa Jau Lucas Hpaure La Awng hte Wa JauThomas Salaw Brang Awng hte RVA Jinghpaw Nsen Shapoi dap hta magam gun lai wa sai magam gun u sa ni hte wu hpung shagu na Mama ni nawku hpung masha ni marai 200 jan sa du shanglawm lai wa sai.
Chyeju dum Misa hkungga hta Wa Saradaw John Mung Ngawn La Sam kaw nna Media hpe Sasana galaw ai lam hta akyu jashawn jai lang chye hkra shakut sa ga nga nna mung n gun jaw mungga tsun lai wa sai.
Misa hkungga ngut ai hte San Petru Kahtawlik Online Akyu Hpyi Group hte RVA KACHIN Servcie We Chat Group hpaw da lu ai majaw mungkan ting hta nga ai Jinghpaw Wun Pawng Amyu sha ni a matu Karai Kasang Mungga,Nawku akyu hpyi ai lam kaga hpaji lu hpa lamang ni hpe lu madat la lu ai,grau nna gaw Facebook, youtube nmai lang ai mungdan hta nga ai hpung masha ni a matu akyu grai hkam la lu ai lam sak se hkam ai lam, RVA Jinghpaw Nsen Shapoi Dap hta magam gun lai wa sai magam gun u sa ni hpe chyeju dum shagrau lamang ni hpe galaw lai wa sai.
RVA Jinghpaw Nsen Shapoi Dap hta lit hkam magam gun lai wa sai Wa Jau Dr.Bernard Dashi Tang Ji kaw nna mung ya na zawn rai nna San Petru Kahtawlik Online akyu hpyi group hte RVA KACHIN Service We chat group hpaw hpang la lu na matu shanhte grai shakut lai wa sai, grau nna Miwa mungdan hta nga ai hpung masha ni gaw shada hpawng jawm akyu hpyi la na matu grai yak ai majaw ya na zawn rai nna We chat kaw akyu hpyi group ni RVA Kachin Service We chat group ni hpaw let sasana magam lam, kaga machye machyang lam hta hpung nbung tim mung shada da gam garan let grai shakut nga ma ai re.Dai majaw (10) ninghpring chyeju dum ai lam hpe galaw lu ma ai.Anhte mung ndai zawn rai nna sasana galaw shakut nga ai ni n gun jaw kasi lam hpawn ba garum shingtau la ga nga nna n gun jaw ga tsun lai wa sai.
San Petru Kahtawlik Online akyu hpyi group hte RVA Kachin Service We Chat group hpe Miss Mary Hkawn Hkawn kaw woi awn hpaw sa wa nna, San Petru Kahtawlik Online akyu hpyi group hpe 2015 July 24 ya shani hpaw hpang la lu nna RVA Kachin Servie We chat group hpe 25 October 2015 ya shani hpaw hpang la lu ai lam chye lu ai.
