Madu Karai e hkye hkrang la hkrum ai ni n law la ma a ni ngu masha langai mi Madu Yesu hpe san dat nu ai. Shaloi masha kade ram hkye hkrang la ai hkrum na re, ngu ai hpe gaw n tsun dan nga ai. Gyip ai chyinghka hku shang na matu shakut nga mu nga nna sha bai tsun dat nga ai. Madu Yesu hpe chye chyang nna, shi a hpang hkan nang ai lam gaw gyip ai chying hka kaw nna, shang na matu, shakut ai lam re. Hpa majaw nga yang e, shi a prat hkrun lam gaw, tinang a byin mayu ra sharawng ai lam hpe shingdu tawn da ai.

Shingrai shinggyim masha ni a hkye hkrang la ai lam a matu, Kawa Karai a ra sharawng ai lam hpe kaja dik hkra galaw shakut hkan sa mat wa ai. Ya daini prat a mawru ndai hta e, shinggyim masha ni law malawng gaw, tinang a hkum hkrang hte myit ra sharawng ai lam ni hpe, tinang hta lai nna, kaga masha ni kadai wa e mung n lu madu ya lu ai nga nna, tinang kam ai hku sha nga shalai taw nga ai. Dai zawn n kaja ai myit jasat a majaw tinang a hkum hkrang hpe gun rai ni zawn sung lang let galaw sha pyaw taw nga ma ai. Gyip ai chying hka ngu ai gaw, madu galaw mayu hpe sha galaw ai n re. Karai Kasang a tara hte hkrak sak hkrung nga sa ra ai. Madu Karai zawn anhte sak hkrung nga sa ra ga ai.