Kasa Pawlu tsun ai, kaning re ai lam ni kaw na mung, Karai a tsawra myit hpe n lu ginhka nga ai, nga nna tsun nga ai. Karai a tsawra myit gaw hpa hte mung shiangdaw n lu ai re lam hpe chye da lu nga ai. Anhte ni hkam sha nga ai mayak lam ni, hkrum katut nga ai tsin yam ni hte manghkang lam ni hta, grau hkik hkam nga ai. Madu Karai a tsawra myit kabu gara shiga ni hpe, hkaw tsun sakse hkam nga ai Madu Karai hpe hkrit tsang hpa lam ni hte hkrum katut nga ai. Shingrai Hparishe ni gaw, pru mat wa na matu jahkrit shama tsun nga ai.

Raitim mung Madu Yesu gaw, hkrit ai lam n nga ai sha shi a lit magam rai nga ai Karai a kabu gara shiga ni hpe matut hkaw tsun gat gai na, tsi gawn lajang ai hte hkye la ai magam bungli ni hpe, ngut du hkra galaw sa na re lam ja ja tsun dan lai wa sai. Shingrai anhte shiga madat ni yawng mung, tinang a prat hkrun lam hta, Karai a yaw shada ai lam ni hpe, galaw hkan sa na matu kaga kaning re ai mayak lam ni gaw, dingbai dingna byin ya taw nga ai kun? Kasa Pawlu tsun dan ai zawn, Madu Karai a ngang kang ai tsawra myit hpe e, anhte galoi e mung myit ung ang ai lam n mai byin nga ai law.