November 5, bat masum ya shani na General Audience hta Wa Sarabyin Leo XIV gaw, Hkristu a hkrung rawt ai lam gaw anhte a shani shagu na sak hkrung lam hpe lam madun ya lu ai, prat a lachyum hpe shadik shatup ya lu ai, mungkan hpe myit mada shara hpe jaw ya lu ai lam hpe madi madun y alai wa ai.
Wa Sarabyin gaw shi a (catechesis) tara mungga sharin ai hta, Hkristu a hkrung rawt ai lam hpe “myit masa (idea) n re, theory n re, makam masham a npawt nhpang Mabyin re” ngu ai hpe myit dum shangun ai.
Anhte a shani shagu na sak hkrung lam hta Hkrung rawt ai lam hpe teng sha kam sham ai ngu ai gaw, anhte a sak hkrung lam hpe galai shai ya lu ai lachyum re ngu nna tsun shaleng dan ai. Ndai galai shai ai lam gaw, “Hkristan myit mada lam a sumnung shingdi ai hte nden marai rawng ai atsam hte mungkan hpe” galai shai ya lu ai. “Shinggyim labau hta n-htoi n mu lu ai shara ni hta pyi Shi a sakse ni tai lu na re” nga nna Wa Sarabyin tsun shadut da nga ai. “Paschal myit mada lam gaw anhte hpe myit n daw shangun ai.”
Wa Sarabyin Leo XIV gaw, shinggyim masha ni a prat hta byin nga ai myit ru myit tsang lam, tsin-yam tsindam, mayak mahkak ni a lapran Hkristu a hkrung rawt ai lam gaw prat lachyum hte lam matsun jaw ya nga ai ngu ai hpe ahkyak shatai tsun shalawm da nga ai. Shi gaw Yesu hpe “lodestar” ngu nna tsun dan ai, n hkru n kaja ai lam ni hpe lai nna masha ni hpe lam madun ya ai, myit mada lam, shamai shatsai ai lam, bai gram lajang ai lam ni hpe jaw ya ai.
Hkrung rawt ai lam gaw lai wa sai aten na mabyin masa sha n rai, hpring tsup ai tengman ai lam rai nna, Eucharist hte Easter mung sung hku nna shani shagu hkam sha lu ai lam rai nga ai, nga nna Wa Sarabyin sang lang dan ai. “Wudang Lam” hpe “N-htoi Lam,” de galai shai kau ya nna, kam sham ai ni hpe hkra machyi hkrum ai hpang, kabu gara lam hpe tam na matu saw shaga ya nga ai.
San Pra ai Teresa Benedicta a ga hpe lakap nna, shinggyim masha ni gaw galoi mung ‘hkum tsup ai lam hte lak lai ai lam hpe tam ai, shadawn sharam hta lai nna ra sharawng ai lam hpe tsun shadum ya nga ai. ‘Paschal shiga’—yubak mara hpe tsaw ra myit hte si hkrung si htan hpe dang kau ai—dai gaw, tsun ga nga yang, labau hta tsaw dik htum ai hte galai shai shangun ai shiga rai nna, shinggyim masha ni a prat lachyum hpe ra sharawng ai myit hpe shadik shatup ya nga ai.
Hkrung rawt ai lam gaw shinggyim labau hpe galai shai kau ya ai, myit daw myit hten ai lam hpe myit mada shara de galai shai kau ya ai, dai lup sung hku hpe shawng mu ai num sha ni hpe lamu kasa tsun ai ga gaw sakse kumla shatai ya nga ai: “Shi hkrung rawt sai; Shi ndai kaw n nga sai.” ngu ai ga rai nga ai.