Wa Sarabyin Francis tsun lai wa ai anhte shada tsawra hku hkau ai lam gaw (Closeness is God`s Style) Karai Kasang ra ai hkrang nan re. Shut hpyit mara lu ai ni, machyi ai wunma hte masha ni zawn re ai n hkum zup ai ni kaw sa du ai lam gaw, Hparishe ni a matu myit pyi n dang myit ya lu ai. Shingrai makau kaw yu mada ya nga ai gaw yawm mat wa ai sagu hpung masha ni, n’gun yawm mat wa ai nawku hpung a matu yu rem lanu lahku ya ai mung re. Bai sagu rem wa ngu ni, tinang a sagu lawng hta shang wa ai sagu ni hpe chyu sha yu gawn lajang taw nga n mai ai.

Dai hku galaw nga yang, kaga lam shut taw nga ai sagu ni hpe mung jasum kau na gaw teng sha re. Dai hta n ga, dai sagu a hpang de kasi la nna, hkan nang mat wa ai kaga sagu ni hpe mung jasum kau na sha re. Karai Kasang gaw, mat mat wa ai sagu ni hpe tam na matu, shi a kasha hpe mungkan ga de dat dat ya sai. Ya daini nawku hpung gaw, Madu Yesu a hkye hkrang la ai magam matut manoi galaw ai a majaw, Karai Kasang kaw sa shingbyi ai ni, myit malai ai hte bai wa ai ni a majaw, kabu awng sharawng nga ga. Dai majaw nawku hpung masha ni yawng ya nga ai sagu ni hte  myit dik na n nga ai sha, nawku hpung hpe tawn kau da ai ni, nawku hpung a sharin shaga lam ni hpe hkap la na yak taw nga ai ni, madu a kabu gara shiga n chye shi ai ni hpang de sasana galaw na lit nga ga ai. Dai gaw Madu Yesu ra ai hkrang nan re.