Mani Yesu gaw, htawm hpang prat na matu, n tara ai, hpaji rawng ai hku hparan hpareng wa a ga shadawn hpe anhte na lu saga ai. Dai ni gaw anhte hkum nan arung arai ni hpe jai lang ai lam hte seng nna matut nna sadi jaw nga ai.
Anhte gaw “n ding n man ai sutgan” hpe anhte a matu “jinghku jingyu” lu hkra jai lang nga ga ai (anhte a ahkyak dik ai jinghku gaw Karai Kasang rai nga ai!). Ndai ladat gaw anhte hpe hkrat sum shangun ai hpang jahtum e htani htana nta de” hkap tau la na matu rai na hpe myit mada ga ai
Anhte a galaw ra ai lam gaw, matsan mayan ni hpe garum shingtau lam rai nna, Karai Kasang a tara tingnyang a man e anhte a maga de nga na re, hpa majaw nga yang, shanhte hta anhte a sutgan ni hpe “bang da” sai majaw re.
Lam mi hku tsun ga nga yang, gumhpraw law law lu ai gaw shut ai lam n nga ai. De a malai, dai sutgan ni hpe gara hku jai lang ai ngu ai mahtang she ga san rai nga ai: Kaji kajaw hta sadi dung ai wa gaw, law law hta mung sadi dung nga ai…Tsun mayu ai gaw, anhte a prat hta lu wa ai arung arai ni hpe Karai Kasang a Mungdan hpe gawgap na matu, grau tara rap ra ai shinggyim wuhpawng hpe gawgap na matu jai lang ai rai yang, grau kaba ai lam langai ngai hpe galaw mai ai, anhte a Karai Kasang hte myi man pa let htani htana nga lu na re.
Ndai mungkan ntsa nga ai arai yawng gaw yawng a matu rai nga ai. Anhte gaw anhte a lata de du wa ai arai ni hpe hpareng ai ni sha rai ga ai, dai hpe gara hku jai lang ai ngu ai hpe yu nna tara jeyang hkrum na re. Anhte jai lang ai lam hta, Karai Kasang shi hte rau nga lu na matu ra sharawng ai n htum n wai ai kabu gara lam hpe teng sha hkam la lu na matu gaw madung rai nga ai.
Dai ni aten hta shanhte a ningmu hpe bai myit yu yang, Yesu a ga hpe myit masin hta bang da ai ni, shi tsun ai ga hpe teng sha madat mara ai ni mung law law nga ai hpe anhte a prat hta mu lu ga ai. Bai nna yawn hpa gaw, dai hte nhtan shai ai lam hpe mung mu lu ga ai. Nkau mi gaw, shanhte a ja, gumhpraw yawng, mying gumhkawng lam hte sut su ai sak hkrung lam yawng hta, manu dan ai lam langai mi hpe shamat kau nga ma ai, shinggyim masha ni manu shadan ai lam gaw Karai Kasang a man e matsat shabat rai nga ai.