Myitkyina Cathedral Jau ginwang, San Columban Nawku Jawng wang, St. Thomas Htingnu hta Cathedral Jau giwnang kata shanu nga ai Sara gaiwang lawk ni kaw na hpung masha ni a Nawku Sen Hkum Mahkawn shingjawng poi hpe 15/11/2025 ya shani galaw lai wa sai.

Ndai Nawku Sen Hkum Mahkawn shingjawng poi hta Myitkyina Cathedral Jau ginwang kata Sara gaiwang jahku (9) nga ai hta na lawk (8) shanglawm shingjawng lawm ai rai nga ai. Shanglawm ai Sara gaiwang ni gaw Tatkone Htoi San, Tatkone San Pya,Du Kahtawng, Yuzana,N Jang Kawng, Myo Dwi, Kachin Zu hte Le Kone Sara gaiwang ni rai nga ai.

Ndai shingjawng poi Numbat Langai kaw nna Manga du hkra lata la nna du na 29/11/2025 ya shani gaw hpang jahtum (final) shingjawng sa wa na rai nga ai.Shingjawng poi hta shanglawm shingjawng lai wa sai lawk (8) kaw na hpang jahtum (final ) shingjawng poi hta shanglawm shingjawng lawm lu ai lawk (5) ni gaw          1.Du Kahtawng,

          2.Yuzana

          3.Lekone

          4.Tatkone San Pya

          5.Myo Dwi lawk ni rai nga ai.

Ndai Shingjawng poi hta masat jaw ya ai tara agyi ni gaw 1.Sara Naw Hpwi Mung Dan Seng Lat ( K.T.C.S Nawng Nang Chyum Dakkasu Music Sharin Sara) 2.Sara  Lawt Awng ( St. Columban Orchestra lit Hkam Sharin Sara) hte Saranum Maru Nang Awn (KBC-Music Sharin Sara) ni kaw nna masat jaw ya ai rai nga ai.

Ya na zawn shingjawng poi hpe galaw ai lam a yaw shada lam gaw Du na Hkristmas ladaw hta Madu Karai Kasang a chyeju  hpe pyaw ngoi ai yu ngwi hte daw jau lu na matu,mahkawn shingni hte Music hpaji lam hta rawt jat wa lu na matu hte grau nna gahkyin dumdin wa lu na matu yaw shada let galaw ai re lam Myitkyina Cathedral Jau ginwang, Music Komiti Ningbaw Sara Maru Naw Htoi tsun ai hku nna chye lu ai.