Daini na myit sumru lamang hta:
A Constant Companion (Matut Manoi Rau Nga ai Manang) ngu ai hpe ga-baw hku nna la ga.
Ndai ga-baw hte lakap nna Kasa Pawlu Roma ni hpang de shagun ai Laika, daw kaba matsat, kaji hkun-kru the hkun-sanit (8:26-27) hpe shawng madat yu ga:
“Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga timung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai;
Kraw lawang e sawk yu ai wa chyawm gaw, Wenyi a myit hpa rai nga ai gaw chye ya nga ai: kaning rai nme law, Karai Kasang ra ai hte maren, chyoi pra ai ni a matu mara shi hpyi htinglu ya nga ai.”
Ndai chyum mungga daw hpe madat la ngut ai hpang, Chyoi Pra ai Wenyi hte hkuhkau ai gaw kaning re ai hpe ngu ai kun jawm dinglik yu ga. Shi anhte hte ni htep nga ai lam, shi a nsen hpe anhte na lu ai, shi anhte hpe lam woi ningshawng jaw ai lam ni gaw – Karai Kasang hte anhte a matut mahkai lam hta sung dik rai nga ai.
Anhte kaga masha ni hte kanawn mazum matut mahkai ai hta aten la ai zawn, Chyoi Pra ai Wenyi hte hkuhkau ai lam hta mung aten la nga ai, aten jaw ra ai.
Anhte hkye hkrang la hkrum ai shaloi, Karai Kasang a Kumhpa, Hkristu a Wenyi ngu ai Chyoi Pra ai Wenyi anhte hta shanu hpang sai lam, Ehpesu masha ni hpang de shagun ai Laika, daw kaba langai, daw kaji shi-masum hte shi-mali hta tsun da ai:
“Nanhte mung, nanhte hpe hkye hkrang la sai kabu gara shiga ngu ai tengman ai mungga hpe na yu nna, shi hta e kamsham ngut yang, ndat da ai Chyoi Pra ai Wenyi hte dazik kap ai, hkrum manit dai.
Wenyi chyawm gaw, Karai Kasang a hpung shingkang shakawn kungdawn na lam a matu, shi mari da sai ni gaw htingrai htingrat ai chyeju lu la hkra, anhte a Sali wunli a masat dingsat rai nga ai.”
Dai Chyoi Pra ai Wenyi anhte hta shanu nga hpang wa ai kaw nna, Karai Kasang hte anhte a matut mahkai kanawn mazum ai lam gaw, anhte chye madat myit mang lu ai hta grau sung ai hku nga hpang wa sai. Dai Wenyi gaw nang hte manang tai hkra – aten galu rau nga mayu nga ai.
Nang ht e seng nna, Shi myit ai, hkam sha ai gaw Kawa Karai a salum kaw na rai nga ai majaw na a matu kaja dik re ngu ai lam shi nang hpe chye shangun mayu nga ai.
Chyoi Pra ai Wenyi a sat lawat kumla ni hpe chyum laika hta law law mu lu ga ai.
Shi shaga ai hpe Kasa Laika, daw kaba shi -masum, kaji lahkawng (13:2) hta mu lu ga ai:
“Ya shanhte Madu hpe nawku let lusha gam nga yang, Chyoi Pra ai Wenyi gaw, ‘Barnaba yan shawlu hpe, ngai shaga da ai amu gun hpai na matu san da mu,’ nga ai.”
Ehpesu ni hpang de shagun ai laika, daw kaba mali, kaji sum-shi (4:30) hta Chyoi Pra ai Wenyi mung yawn chye ai nga nna tsun da ai:
“Hkye hkrang la hkrum ai nhtoi du hkra, nanhte hpe dazik shakap ai Karai Kasang a Chyoi Pra ai Wenyi hpe, myit hkum shayawn myit.”
Lahta de anhte na la sai Roma ni hpang de shangun ai laika hta Chyoi Pra ai Wenyi gaw anhte hpe garum ai wa rai nna, anhte akyu hpyi ai shaloi mung garum ya ai nga nna tsun da nga ai; bai madat yu ga:
“Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga timung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai;
Kraw lawang e sawk yu ai wa chyawm gaw, Wenyi a myit hpa rai nga ai gaw chye ya nga ai: kaning rai nme law, Karai Kasang ra ai hte maren, chyoi pra ai ni a matu mara shi hpyi htinglu ya nga ai.”
Chyoi Pra ai Wenyi gaw kade ntsa e mung “shi hte hkuhkau ai lam hpe” shadut jahkat rai n galaw ai:
Chyoi Pra ai Wenyi gaw, nang madat jang shi nang hpe ga tsun nga ai; na a myit mang ai hpe hpaw ya jang shi nang hpe shadan shaleng ya ai; nang garum hpyi jang shi nang hpe lam madun woi awn nga ai.
Shi gaw ninggun atsam kaba rawng ai zawn, grai mung grit nem sumnung nga ai; atsam kaba rawng ai zawn grai hkungga lara chye nga ai. Dai majaw nang she shi hpe garum hpyi ai rai yang, shi gaw na a matu kaja dik ai manang tai ya na ra ai.
Akyu Hpyi Ga
- Nang hte ni htep rau nga na matu Chyoi Pra ai Wenyi kaw hpyi u. Shi shanu nga ai lam hpe dum chye lu na matu aten la u. Ehpesu 1:13-14 hta tsun da ai hpe bai dum ga.
- Chyoi Pra Wenyi hte hkuhkau lu ai majaw shi hpe chyeju dum u. Na a prat hta shi hkan lawm ya nga ai majaw, nang hte shaga ai majaw, nang hpe lam woi ya, garum ya, akyu hpyi ya ai majaw, chyeju dum shakawn u. Roma 8:26-27 hta anhte na la sai hpe bai dum u.
- Ya Wenyi shi nang hte seng nna hkam sha ai lam hpe mung san yu u. Nang hte seng ai, makau grup-yin mungkan hte seng nna shi gara hku mu mada hkam sha ai hpe san yu u. Na a myit hta mu mada dum wa ai lam ni hpe matsing buk hta ka jahkrat da u.
Akyu Hpyi Lamang hta shang lawm nga ai ni yawng, Chyoi Pra ai Wenyi a shalan shabran ai hte simsa ai chyeju hpe hpring tsup hkra hkam la lu myit ga!
By Cardinal Charles Bo
