Daini na Ja Chyum Mungga hpe hti sumru yu ai shaloi e, Yesu hpe mu mayu ai Zahke-U a lam hpe na chye la lu ga ai. Daini anhte masin salum san tsawm hkrak ai marai lahkawng a lam hti la lu ga ai. Langai gaw Elizabeth hte Zahke-U yan rai nga ai. Shaning law law n tara ai hku na ahkun hkangse hta nna, kan bau bungli galaw nga ai Zahke-U gaw, hpang jahtum e shi a myit kraw hta, Madu Yesu hpe mu mayu ai myit katu wa nna, Yesu hpe hkan tam wa ai re. Shingrai shi gaw Madu Yesu hpe mu lu na matu, masha unawng kaba hpe tawt lai ai hpun langai mi a ntsa de lung mat wa ai re.

Ndai lam gaw, shi Madu Yesu hte bai hku hkau matut mahkai mayu ai shi a jet ai ra sharawng myit nan rai nga ai. Dai majaw Madu Yesu gaw, Zahke-U hpe shi a nta kaw manam na ngu nna, hkye hkrang la ai lam gaw dai ni n dai nta kaw du taw sai ngu tsun ai rai nga ai. Zahke-U gaw, shi a prat hkrun lam de Karai Kasang hpe bai hkalum shaga la ai hte, Shinggyim masha atai sa la sai Karai Kasang gaw, kabu gara ai hte shi a n ta de shang wa ai. Madu Yesu mung Zahke-U hpe kabu gara hkap tau la let, Ahkun hkangse hta ai prat kaw nna, dingman dinghpring ai prat a sak hta bai hkawm sa shangun nu ai. Zahke-U hpe mung, myit masin galu kaba tsawn htap ai, tsawra myit a sak prat hkrun lam hta hkawm sa chye hkra shading sharai ya nu ai.