Daini na Ja Chyum Mungga hpe hti sumru yu ai shaloi e, Arang gumhpraw ap ai ga shadawn hpe na la lu ga ai. Daini na kabu gara shiga hta, hkrit tsang hpa lam amyu myu hpe tsun da nga ai. Dai gaw Karai Kasang hpe hkrit hkungga ai lam hte kaga langai mi gaw, hkrat sum ai majaw, mara dan hkam ra na lam hpe hkrit tsang ai lam ni rai nga ai. Shing rai kabu gara shiga hta na hpang jahtum na n chyang mayam wa gaw, hkrat sum ai lam hte n hkrum mayu ai majaw, hpa lam hpe mung shi n kam shakut galaw ai.

Shi a galaw sa ai lam ni gaw, Madu hpe tsawra manu shadan ai lam, hkungga ai lam n nga, hkrit tsang ai lam ni sha rai nga ai. Dai hkrit tsang ai lam kaw nna, shi n lu tawt lai mat nga ai. Shiga madat ni e, jet ai tsawra myit ngu ai gaw, anhte yawng hpe hpa lam ni hta raitim, n gun mi alu rai galaw lu na matu, n gun jaw ya nga ai re. Dai tsawra myit gaw, Karai Kasang hpe hkrit hkungga tsawra ai lam nan rai nga ai. Kaning re ai ap nawng daw jau ra ai lam ni mi raitim, tsawra myit hte tawt lai lu na rai nga ai. Shingrai hkrit tsang lam ni hpe tawt lai lu nna, apu asi ni hte hpring zup law htam ai magam bungli ni hpe law law galaw sa let, Madu Karai Kasang hpe shakawn kungdawn nga ga law.