November 22, Bat kru jahpawt galaw ai Jubilee Audience hta, Wa Sarabyin Leo XIV gaw, Tsaban 20 a shawng daw hta, tinang prat hpe kaja ai magam bungli galaw na matu ap nawng lai wa sai, Karai Kasang a shangun ma, American Kahtawlik Dorothy Day a lam hpe myit sumru yu let, shi zawn, Hkristan ni mung, shinggyim masha ni a sari sadang hpe atsam rawng ai hku makawp maga let, simsa lam hpe shachyen shaja ra ai lam hpe madi madun dan lai wa ai.
Hkristan ni gaw kaja ai lam galaw ra ai, teng man ai lam hta n htingnut ai sha tsap ra ai….
Wa Sarabyin Leo XIV gaw, Karai Kasang a shangun ma Dorothy Day (1897–1980) hpe myit sumru na matu lata la let, Vatican kaw galaw ai bat kru ya shani Jubilee Audience hta ndai lam hpe tsun lai wa ai. American shiga dap hta bungli galaw ai, Kahtawlik makam masham de gale shang wa ai wa, Great Depression aten hta Kahtawlik Bungli galaw masha hpung hpe rau hpaw hpang wa ai wa re.
Matsan mayan ni, htawt sit ai bu hkawm ai ni, bungli galaw masha ni a matu magam bungli galaw ai a majaw mying kaba ai ‘Day’ gaw labau hta Kabu Gara Shiga hte sak hkrung hkawm sa ai majaw shakawn shagrau hkrum ai lam rai
Sadi dung ai hte sak se sagan tai na matu shaga la hkrum ga ai
Wa Sarabyin gaw, kaga masha ni hpe garum na matu, sak se sakgan tai na matu, dai ni na Kabu Gara Shiga kaw na n-gun lu la ai. Madu hpang de kayin wa na matu, anhte hpe jaw da ai chyeju kumhpa law law hpe chye na hkra karum ya na matu, Kabu Gara Shiga a tsawra myit hpe teng sha madun dan lu ai, shinggyim wuhpawng hpe rawt jat galu kaba wa hkra, anhte a prat hta ngang kang ai hte tsap ra ai lam hpe madun dan na matu tsun shadut ya nga ai. Dorothy Day gaw Kahtawlik hpung masha ni a matu kasi ningli kaja langai mi, n-gun jaw lam kaba langai mi tai lu ai lam hpe shadum ya nga ai.
Hkristu hpe kasi la nna shinggyim wuhpawng hpe galai shai hkra shangun ai
Wa Sarabyin sang lang dan ai hta, Dorothy gaw, “masha law law a matu dai shingran gaw hkru n kaja ai yup mang re ai hpe chye na ai, Hkristan langai hku nna shi gaw bungli galaw masha ni hte, htawt sit ai nib u hkawm masha ni hte, sat nat ai sut masa a majaw kabai kau hkrum ai ni hte kanawn mazum ra ai hpe shi chye na ai.”
Dorothy gaw shi a myit masin hte hkum hkrang yawng tsawm htap hkra daw jau ai hpe yu nna, Wa Sarabyin Leo gaw shi a daw jau ai lam hte magam bungli ni gaw “myit npyaw hpa lam hpe tsawm htap ai kanawn mazum lam hte ta tut galaw sa wa ai lam de galai shai kau ya ai” hpe yin la ai.
“Myit mada ai lam gaw, Yesu hte rau tsap ra ai,” nga nna Wa Sarabyin Leo tsun ai, hpa majaw nga yang, “Shi a sharawng sha ra myit gaw anhte a sharawng sha ra myit rai nga ai.” Shingrai, ndai Myit mada ai Jubilee gaw anhte hta mung, Nawku hpung ting hta mung, ndai sharawng sha ra myit hpe bai jahkrung ya lu na matu akyu hpyi ya dat ai.