Daini na Ja Chyum Mungga hpe hti sumru yu ai shaloi e, Yeruslem nawku htingnu hten run mat ai lam na chye lu ga ai. San pra ai Catherine gaw hkaw hkam Constan a kasha rai nga ai. Tsaban (3) ten hkristan ni hpe zingri ai ten tara a matu sak kau hkrum sai. Shi a mau na zawn re ai makam masham hte hkaw tsun sak se hkam ai majaw, masha ni hpe hkristan makam masham de galai kau ya lu ai majaw, nga leng shaprai hte rin sat kau hkrum ai. Shi gaw makam masham ninghkring ni, hpung tang hpaji ninghkring ni, tara agyi ni, shangun ma ni yawng a kam hpa ai san pra masha langai mi rai nga ai.

 Bai shi gaw dai aten hta, htawk dang ana byin ai ni hpe makawp maga ya ai jan re hpe chye lu ga ai. Shi gaw San pra ai Christopha, San pra ai Baraba ni hte maren n dum shami si mat wa ai. Bai san pra ai Catherine gaw, shinglet hta byin chye ai ana ni hpe lak san makawp maga ya ai jan ngu kam hpa ma ai re.  Daini kabu gara shiga hta e, mungkan ntsa byin hkrum nga ai ana zinli ni hkrit hpa hpyen amyu ni hpe tsun da nga ai. Dai lam ni hpe Madu Yesu gaw hkum hkrit myit, hkrit tsang yawn hkyen hpa lam ni mahkra gaw, anhte a prat a matu jahtum n re. Dai gaw sumsing mungdan she re ngu tsun dan nga ai. Shingrai, San pra ai Catherine zawn, jam jau yak hkak ai ten ni hta e mung, anhte gaw Madu Karai Kasang hpe tut nawng kam hpa ra nga ga ai ngu ai hpe ja ja n gun jaw shadum ya nga ai re.