Daini na Ja Chyum Mungga hpe hti sumru yu ai shaloi e, Yeruslem hten run mat na lam hte tsin yam ni hpe na lu ga ai. Yandai aten hta e, Philippines hte America mungdan ni hta, Thanksgiving Day Karai Kasang hpe chyeju dum ai ninghtoi hpe hkik hkam ai hku galaw ai htung hking nga ma ai. Shanhte gaw lak san chyeju hkam la lu yang, lak san Karai Kasang hpe chyeju dum chye ma ai. Hpa majaw Madu Karai hpe chyeju dum nga ma ta. Tinang a prat ting hta shani shagu hkam la lu ai chyeju ni hpe bai hti sumru yu ga.

Daini Madu Karai a makawp maga ya ai majaw, Hkanghkyi a n-gup hta na Daniel asak lawt wa lu ai lam anhte hti lu ga ai. Madu Karai gaw nang hpe jam jau ai lam hta na shalawt la ai majaw, shi hpe chyeju dum ai. Madu a kabu gara shiga hta, Madu Yesu lahkawng lang bai n du sa shi yang, shinggyim masha ni hkrum katut ra na tsin yam ni hpe madun dan ai lam mung rai nga ai. Raitim Madu gaw hkum hkrit mu, nanghte a hkye la ai lam gaw, ni wa magang nga ai ngu tsun da nga ai. Shingrai yak hkak jam jau lam ni hpe tawt lai lu na matu n gun atsam jaw da nga ai majaw, Madu Karai hpe chyeju dum nga ga. Anhte ni hkrum wa na mayak lam ni mahkra hpe Shi Madu shalan shabran ya na hpe teng sha kam let, Madu Karai hpe chyeju dum nga ga law.