Myitkyina Saradaw Sasana, Njang Dung St. Paul nawku jawng wang kaw San Francis Xavier Mama ni woi awn nna hpaw tawn da ai hpaji sharin jawng ningnan hpe Karai Kasang a chyeju hte gawgap ngut kre la lu sai majaw Jawng Ningnan hpe akyu hpyi shaman ai lamang hpe ( 1. 12. 2025 ) ya jahpawt galaw la lu sai.
Njang Dung, St. Paul nawku jawng wang hta St. Francis Xavier Mama ni woi awn nna Ma kaji ni hpe shalat shapan hpaji sharin ya ai Ma Shalet jawng hte laika sharin jawng hpe tsang kaji kaw nna Grade ( 12 ) du hkra jawngma ni tsa lam hpe hpaji sharin ya taw nga ai rai nga ai.
Jawngma law jat ai wa ai hte rau jawng gawk n law ai mayak mahkak lam ni nga wa ai majaw Mama ni lam tam shakut shaja let hpaji jawng ningnan hpe gaw gap da lu sai rai nga ai.
Ndai jawng hta makam masham hpung, amyu hpung n ginhka ai sha hpaji sharin mayu ai ni, grau nna hpaji matut sharin hkam la na yak hkak ai ma ni hpe hpaji sharin ya taw ai hpaji jawng re ai lam chye lu ai.
