Myitkyina, Kahtawlik Saradaw Sasana hta magam gun nga ai Wa Saradaw hte Wa Jau ni a myit sumru akyu hpyi ai, Wutsawk ( Annual Retreat ) hpe December 02 – 05, 2025 ya shana de angwi apyaw sha galaw shangut la lu sai rai nga ai.

Wa Saradaw hte Wa Jau ni a ninghtoi ( 3) ya tup galaw ai Wutsawk hta Retreat Preacher hku nna Yangon, St. Joseph Jau Tai Dakkasu Jawng Up rai nga ai Wa Jau Kaba Cyprian Aung Win kawn wutsawk sa jaw ya sai re.

Myit sumru akyu hpyi ai Wutsawk hpe Benediction ngu ai Chyoi Pra Hkum shaman ai akyu lamang hte shangut ai.

Benediction ngut ai hpang Wutsawk jaw ya sai Wa Jau hpe tsawra myit madun ai chyeju dum kumhpa hte shagrau la ai.

Shi a jawngma dingsa ni rai nga ai Wa Jau ni kawn nna mung jawng up jau tai lai wa sai Wa Jau Cyprian hpe Htunghking maka kap ai Ntsa Palawng, Kawa hte kasha ni a tsawra myit makyit mahkai, shagrin shangang da ai Ja Ta Chyawp kumhpa hte tsawra myit madun lai wa ai.

Wa Saradaw John Mung Ngawn La Sam kaw nna Wa Jau Kaba Cyprian hpe chyeju dum ga tsun ai hte Wutsawk hta shang lawm sai Wa Jau ni yawng ndai zawn myit sumru akyu hpyi, Wutsawk hpe galaw la lu ai gaw tinang a “Myit Masin, Hkum Hkrang, Wenyi” ninggun atsam bai jahpring la ai a marang e shawng lam hta matut galaw sa wa ra na, woi awn sa wa na Sasana magam lam ni hta Karai Kasang a myit ra ai hte maren myit masin ningnan, masha ningnan hte matut galaw sa wa lu na rai nga ai lam tsun ai.

Retreat preacher rai nga ai Wa jau kaba Cyprian Aung Win kaw nna mung Wa Saradaw hte Wa Jau ni yawng hpe grai chyeju dum ai lam, shi jawngma tai nna jau tai wa sai Wa Jau ni hte rau Missa Hkungga Nawng lu ai majaw grai myit pyaw ai lam, Wa Jau ni yawng gaw kahpu kanau ni hkrai rai sai majaw shada da kahpu kanau myit majing rawng ra na lam, myit daw myit kaji hkrum wa ai aten ni hta shada da ninggun jaw, garum shingtau hkat na lam Wa Jau ni hpe Wutsawk shangut numhtet ga tsun ai.

Wutsawk hta Wa Saradaw 2 hte wa jau ni yawng marai 66 Shang lawm ai lam chye lu ai.

By – Julia Ja Ing