4th Sunday Of Advent, Year A
Ready to Receive Mary’s Child, Emmanuel
Readings: 1st: Is 7:10-14; Ps: 23:1-6; 2nd: Rom 1:1- 7; Gos: Mt 1:18-24
Ndai Advent a hpang jahtum na Laban shani hta Karai Kasang anhte hpe hpaw shadan dan ai kumla gaw grai ahkyak nga ai. Karai Kasang lata la ai messiah gaw Dawi a dinghku kaw na rai nga ai. Raitim, Maria a kasha gaw amyu bawsang yawng a matu rai nga ai. Dai majaw, anhte yawng gaw amyu bawsang yawng a daw langai mi rai nga ai. Ndai lam gaw Karai Kasang a tsawra myit, Hkristu a sali wunli hta shang lawm na matu shi a saw shaga ai lam rai nga ai. Dai majaw, Hkristu gaw anhte yawng a matu du sa nga ai.
Ndai Laban shani na daw 1 hta, Karai Kasang gaw Meshia hte seng nna kaba dik htum ai, hkrak dik htum ai kumla hpe jaw da ai: “Num kasha langai mi gaw na-um nasin rai nna, kade nna yang Emanuela ngu ai shadang sha hpe shangai na ra ai, lachyum gaw Karai Kasang anhte hte rau nga ai!” Hkawhkam Ahaza gaw Karai Kasang hpe chyam dinglik ai lam hpe shagrit shanem ai hpang she ndai kumla hpe jaw ai hpe matsing ra ai.
Dai majaw ndai kaw na sharin la mai ai lam ni hta, 1. Karai Kasang hpe shawng n pat shingdang ai sha ai sha Karai Kasang tai na matu ahkang jaw ra ai ngu ai lam lawm ai. Lahkawng, Karai Kasang a tara jeyang ai lam, anhte a matu shi a kaja ai myit ra ai lam hpe kam hpa na matu sharin la ra ai. Masum, anhte gaw kumla ni a hpang n hkan hprawng ra sai, hpa majaw nga yang, Karai Kasang gaw Yesu Hkristu hta hpaw shadan dan ai lam hpring tsup jaw da sai. Mali ngu na gaw, anhte shagrit shanem ai rai yang, Karai Kasang gaw, “Hkristu hta shi tawn da ai shi a myit ra ai lam a makoi magap da ai lam hpe hpaw shadan dan na re” (Ehp 1, 9).
Daw Lahkawng hte kabu gara shiga lahkawng yan gaw Hkristu a shangai wa ai lam hte asak hkrung lam hpe tsun dan ai lam ni rai nga ai. Karai Kasang myihtoi ni hku nna anhte hpe jaw ai kumla ni, (dai gaw ndai aten hta anhte a myit mada shara a npawt nhpang rai nga ai kumla ni) gaw flatus vocis (kaman lila ga si ni) n re ai hpe shadum ya nga ai. De a malai, tengman ai hte Hkristu hta hpring tsup nga ai.
Dai majaw,daw lahkawng hta, myihtoi ni a ga hku nna du sa ai ga sadi ni hpe Pawlu shadum ya nga ai. Ndai shara hta, grai ahkyak ai lam masum hpe madi madun da ai. Langai, Hkristu a Karai Kasang kaw na pru wa ai lam hpe ndai hku shadum ya ai: “Ndai gaw Karai Kasang a Kasha Hkristu a kabu gara shiga rai nga ai.” Lahkawng, Hkristu a shinggyim npawt nhpang hte shingra tara hpe shadum ya ai: “…Shi gaw shinggyim ru sai hta Dawi a aru arat kaw na rai nga ai…” Ndai lam ni yawng gaw Hkristu gaw teng sha ga shaka tawn da ai Meshia re ai hpe kam sham na matu rai nga ai. Masum ngu na gaw Hkristu hte anhte a hku hkau lam hte seng ai lam re. Dai gaw, Karai Kasang a masing hta anhte gara hku hkan sa ai lam, shi a hkye hkrang la ai lam: “Nanhte gaw dai zawn re ai amyu ni hta na langai mi rai nga myit dai, shi a shaga la ai majaw, Yesu Hkristu hte seng nga myit dai.” Ndai zawn Pawlu gaw anhte a sali wunli Hkristu hpe shadum ya nga ai.
Dai ni na kabu gara shiga hta, Mahte gaw “Yesu gara hku shangai wa ai lam” hpe tsun dan da ai. Pawlu zawn, Mahte mung shi a ma kaji aten na labau hta Yesu a aru arat hpe hkawhkam Dawi a prat du hkra sagawn da ai. Ndai lam gaw, Yesu gaw teng sha ga shaka tawn da ai meshia re ai hpe kam sham na matu mung rai nga ai (Pawlu tsun ai zawn). Ndai maumwi hta, Maria yan Yosep a grai ahkyak ai hte madung lit hpe Mahte madi madun da ai. Shanhte gaw Karai Kasang a hkye hkrang la ai sasana hpe anhte a matu shadik shatup lu na matu shi a hkrang shapraw ai ni rai nga ma ai. Ndai lam gaw Karai Kasang anhte a labau hte prat hta shamu shamawt nga ai, shinggyim masha ni a ladat hku nna anhte hpang de du sa ai lam hpe sharin ya nga ai.
Hpang jahtum, Meshia du sa na hpe myit mada nga ai zawn, anhte langai hte langai mung gingdan ai shangun ma langai zawn tinang hkum hpe ap nawng da ra ai. Karai Kasang a ga sadi ni anhte a marang e shadik shatup lu na matu, Maria yan Yosep zawn Karai Kasang hte rau jawm galaw na matu jin jin rai nga ra ga ai. Bai nna, Karai Kasang shinggyim masha ni hpe hkye la lu na matu, anhte hkum anhte ahkang jaw ra ai. Dai majaw, hkye hkrang la ai lam hta shang lawm na matu Karai Kasang anhte hpe gara atsam marai hta raitim, dai ni Maria yan Yosep galaw ai zawn, shi hte rau jawm galaw nga ga.