Daini na Ja Chyum Mungga hpe hti sumru yu ai shaloi e, Zahkari a Myihtoi ga hpe na chye lu ga ai. San pra ai Avila myu kaw na Yawhan a lakhtak hta, wudang sumla hpe Ninghtoi ngu nna lachyum la da ma ai. Dai ninghtoi gaw, kade kaji ai sin la ai shara kaw raitim lu jahtoi ya nga ai. Dai zawn sha Madu Karai mung kaji ai ahkaw ahkang kaw nna, anhte a prat de shang wa ai rai nga ai. Anhte a ningsin prat kaw nna, ninghtoi de woi sa wa ai. Madu Yesu gaw kaning re ai mayak mahkak kaw na raitim anhte hpe Hkye mawai la lu sai re. Dai majaw, Kasha Yesu Hpe mungkan ga de shangun dat ai rai nga ai.

Ga shaka dingsa hta hpang jahtum na Myithoi Malahki rai nna, Ga shaka ning nan hpang jahtum myihtoi gaw Yawhan Baptista rai nga ai. Dai Myithoi Malahki a lak htak hpang e shaning (400) daram Karai Kasang a n sen zim mat wa ai. Dai a hpang Yawhan Baptista gaw madu a lam ni hpe gram lajang nna, Madu Yesu hkum nan shinggyim masha ni hpe Hkyela na matu yu sa wa ai re. Shingrai Jahtum chyalai Karai Kasang gaw shi a ga sadi hte maren galaw sa ai. Ya daini Yesu Hkristu hku nna, mara kaw na shalawt ya ai ahkaw ahkang, Nat tsadan hpe dang kau lu ai ahkaw ahkang, ninghtoi re ai Yesu Madu hku nna anhte a prat a ningsin hpe hpaw malang kau ya ai ahkaw ahkang ni lu la nga ai re.