Daini na Ja Chyum Mungga hpe hti sumru yu ai shaloi e, Sape ni zingri ai hkrum na ma ai lam na la lu ga ai. Anhte daini San pra ai Stephen a poi hpe galaw nga ga ai. Shi a sak hkrung lam hte si wa ai shaloi e mung, chyoi pra ai wenyi hte hpring zup ai wa re. Ndai San pra ai Stephen gaw, kasa ni lata ai shawng ningnan kasa lahkawng hta na langai rai nga ai. Brother kaba langai mi a lit magam hpe shi galaw gun hpai sa ai. Garum shingtau ra ai ni hpe garum ya ai. Shi gaw chyoi pra ai wenyi hte hpring zup ai majaw, mau hpa lamik kumla ni lu galaw nga ai.

Shi dai zawn lamik kumla galaw lu ai mung, hkrung rawt ai Madu Yesu hpe sakse hkam ai re. San Stephen gaw, sasana a matu kabu gara shiga hkaw tsun garan gachyan let, jaw ai lam sak hta se hkam nna, nlung hte gabai sat kau ai hkrum mat ai. Shi gaw tengman ai lam hpe ra sharawng ai. Madu Yesu a tara mungga hkaw tsun let, Hkristan a tara hpe tsun jahpyak gumlau ai ni hpe shi bai tsun ninghkap ai. Shing rai shi hpe tsawra ai ni nga ai zawn, n ju n dawng ai ni mung nga nga ai. Dai n ju n dawng tengman lam n ra ai ni gaw, shi hpe mara tam rim la nna, sak kau ai. Raitim shi gaw yawng hpe mara raw ya ai. Shi a hpyen ni yawng a mara a matu, Karai Kasang a mara dat hkyamsa ya u ga. Kawa Karai Kasang kaw hpyi nem kyu hpyi ya lai wa sai.