Yesu tsaw ra dik ai sape gaw kadai rai kun? Teng sha nga yang, dai ni anhte galaw nga ai poi madu kasa Yawhan rai nga ai. Kaga lam law law hta, Yawhan gaw Yesu wudang ntsa si hkam ai aten du hkra Yesu hte rau nga ai tsawra ai kasa re.

Yawhan gaw Yesu hpe galoi mung n kau da ai, Yesu a matu tsap ai hte Shi hpe sadi dung ai lam madun na matu galoi mung n hkrit ai. Yawhan gaw Yesu hpe kam sham ai lam a n-gun hpe madun dan ai hku nna, jahtum du hkra Shi hte rau nga nga ai. Ndai lam gaw shi hpe Yesu a tsaw ra ai sape ngu nna shaga ai lam rai na re.

Anhte a prat hta law law lang Yesu hpe tsawra ai lam tsun shapraw ga ai. Raitim gunglau lam ni du wa ai shaloi Yesu hpe sadi dung na malai gunglau hkrum na hpe lata la chye ga ai. Ndai lam gaw anhte law malawng gaw yak hkak ai hte n hkru n kaja ai prat hpe nga pra shangun ai lam madung rai nga ai.

Yesu hpe sadi dung na matu shakut yang, anhte a prat hta gara hku byin wa na kun? Anhte Yesu hpe sadi dung ai rai yang anhte hkum nan shabyin ai manghkang ni hpe koi lu nna, anhte hta hpa mi byin wa tim hkrit tsang n ra na re. Hpa majaw dai hku byin ai kun? Hpa majaw nga yang, anhte a Karai Kasang hpe sadi dung na matu lata la ai rai yang, kade daram gunglau lam ni nga tim, Shi anhte hpe galoi mung n tawn kau na re.

Hpa majaw gunglau ai lam nang hpe rim la na ahkang jaw ai kun? Na a mahtai gaw, ‘shinggyim masha ni a gawng kya ai majaw’ rai yang, dai gaw nem dik ai mahtai rai nga ai. Shinggyim masha ni a gawng kya ai lam ni hpe ngang kang ai makam masham hte galoi mung dang kau lu nga ai.