Daini na Ja Chyum Mungga hpe hti sumru yu ai shaloi e, Karai a mungga gaw shawng ningpawt e nga nga sai lam, dai mungga gaw, Karai Kasang hte rau rai nga ai hpe na chye lu ga ai. Tengman ai lam hpe tsun na loi tim hkan sa na matu yak la nga ai. Raitim mung teng ai, jaw ai tara hpe gaw, masha shgu hkan sa ra ai lam nan re. Hkristu Madu hkum nan mung jaw ai teng man ai wa re. teng man ai lam n nga ai hpa lam mi raitim a ten galaw ngang grin na n mai ai. Hpa majaw nga yang n dai teng man lam gaw, shinggyin wu hpung wu hpawng hta tsang hte tsang a ningpawt ra a hkyak ai dawnu nan re majaw rai nga ai.

Shingrai kasa Yawhan gaw teng man ai lam ninghkap ai ni yawng gaw Hkristu hpe ninghkap ai ni ngu masat da nga ai. Hkristu hkum nan mung tengman ai wa re ai majaw re. Ngai gaw Lam re. tengman ai wa mung re. A sak mung re. Mungga rai nga ai Madu Karai Kasang gaw, Shi a mying ning sang hta a sak hkrung nga na matu, Teng man ai lam hta sak hkrung ap nawng nga na matu saw shaga nga ga ai. Dai rai yang e Madu Yesu a saw shaga ai hte maren a sak hkrung hkawm sa nga ga ai kun ngu ai hpe ja ja sumru dinglik yu ra ga ai. Daini gaw shaning ting na hpang jahtum shani mung rai nga ai. Dai hte maren, anhte a lai mat wa sai lam ni hpe bai gram na n mai byin mat sai. Lai mat wa sai ten na shut shai ai lam ni hpe kasi la n na, du wa na ten hta e, Tengman ai lam hta, sak hkrung ai ni byin lu hkra anhte yawng shakut let sak hkrung hkawm sa ga law.