Daini na Ja Chyum Mungga hpe hti sumru yu ai shaloi e, Yawhan Baptista sakse hkam ai lam na la lu ga ai. Daini na Madu a kabu gara shiga hta e, Hparishe ni gaw, chye mayu ai myit katu taw ai hte yu kaji ai myit ni a majaw, Yawhan Baptista hpe Nang gaw Mesia kun? Myit htoi Elija i?  ngu nna ga san san lai wa sai. Raitim Yawhan Baptista tsun aigaw, Ngai gaw Hkyela Madu Yesu du sa wa na matu tau nau lajang ya ai wa she rai n ngai. Ngu nna bai htai ya dat nga ai. Dai lam hpe gumhpawn nna yu ga nga yang e, Yawhan Baptista gaw shi hkum nan kadai wa re ai ngu ai hpe kaja wa chye ai. 

Shingrai ndai mungkan hta shi galaw na magam hpe asan sha chye na ai. Dai hte maren shi magam lam ni hpe kaja dik ai hku galaw shakut sai. Hpang jahtum e tinang a asak hpe pyi ap nawng ai du hkra hpang n htingnut ai sha Karai Kasang jaw ai lit magam hpe gun hpai lai wa sai. Dai zawn sha anhte ndai mungkan hta masha sa tai ai mung, Karai Kasang a yaw shada ai lam rai nga ai zawn, anhte ni ganing rai ai lit magam gun hpai sa ra na mung masing nga da chyalu sha rai nga ga ai. Dai majaw Yawhan Baptista zawn, anhte yawng tinang hkum tinang kaja wa chye da nna, tinang gun hpai sa ra ai lit magam ni hpe mung kaja dik dan dan leng leng galaw sa na shakut nga ga law.