January (6) ya Hkaw hkam masum Poi shani hta, Wa Sarabyin Leo XIV gaw, kam sham ai nuku hpung masha marai 5,800 daram hte San Peter’s Basilica hta Chyoi Pra ai Jubilee Chyinghka hpe pat ai hte Myit mada ai Jubilee Shaning hpe tara shang hpungdim dat ai Missa Hkungga hpe galaw lai wa ai.
Shi a mungga hta, Karai Kasang a shadan dan ai lam hpe n bung ai hku mu, hkam la lu ai lam ni hpe myit sumru yu lai wa ai. Hkaw hkam masum a kabu gara ai hte sawk sagawn ai makam masham hte Herod a hkrit tsang ai lam ni hpe myit sumru yu ai.
Wa Sarabyin gaw, Epiphany poi gaw, shi a nga nga ai lam yawng hpe galai shai ya lu ai, myit mada shara hpe jasu ya lu ai, htawm hpang prat nnan hpe hpaw ya lu ai Karai Kasang hpe hpaw shadan dan ai lam rai nga ai, nga nna Wa Sarabyin sang lang dan ai. Hkaw hkam masum gaw myit rawt ai hte nden marai hte hkawm sa wa ai shaloi, Yerusalem hte Herod gaw myit ru myit tsang nga ma ai, makam masham hpe chye chyang ai majaw kalang lang san jep lu ai atsam hte myit mada lu ai atsam hpe gara hku shayawm kau ya lu ai hpe madun dan nga ai. Ndai tension gaw daini na Nawku hpung hpe mung chyam dinglik nga ai, nga nna tsun ai.
Wa Sarabyin Leo gaw, masha law law gaw, hkaw hkam masum zawn makam masham a lachyum hpe naw tam nga ma ai, Nawku hpung gaw ndai tam nga ai shinggyim masha hpe hkap tau la, lam madun, n hkrit ra ai lam hpe ahkyak shatai tsun da nga ai. Chyoi pra ai shara ni hte Nawku hpung hkum nan gaw, hkang zing ai, Karai Kasang galaw nga ai hpe asak hkrung lam hte hpaw tsun shaga ra ai.
Herod a hkrit tsang ai lam hpe Kabu Gara Shiga a lawt lu lam hte shingdaw nna, Wa Sarabyin tsun ai gaw, Hkristu hta kabu gara ai lam gaw kam sham ai ni hpe nden marai hte jahpring ya ai lam hpe shabyin ya ai. Epiphany poi a madung gaw, shagrit shanem ai, manu dan ai, asak jaw ya ai Hkristu shi nan a kumhpa rai nga ai. Shi gaw, Nawku hpung hpe, hkrang sumla n re ai sha, hkrung nga ai nta langai zawn nga nga na matu, Karai Kasang a tsawra myit hte galai shai wa ai shinggyim masha nnan de myit mada shara hkawm sa ai ni hku nna, rau jawm hkawm sa na matu saw shaga dat ai.