The Baptism of the Lord (Year A)
MADU YESU KASHIN KAMUN HKAM AI POI LABAN, SHANING ( A ), 2026
The Baptism of the Lord (Year A)
Isaiah 42:1-4,6-7; Acts 10:34-38; Matthew 3:13-17
Daini gaw Hkrismat ladaw hta hpang jahtum shani rai nga ai. Anhte a Karai Kasang gaw anhte a lapran hta laklai ai hku du sa wa sai lam hpe anhte hpe chye shangun ai dan dawng ai lam kaba masum hta na hpang jahtum ngu na hpe anhte mu lu ga ai.
Dai masum hta na, shawng nnan shadan dan ai lam gaw, Behlehem mare na dumsu U lawng hta Yesu shangai wa ai mabyin rai nga ai. lai wa sai bat hta galaw ai lahkawng lang ngu na shadan dan ai lam rai nga ai Epiphany hta, Yesu gaw shi a amyu masha ni a matu sha n rai, mungdan shagu na masha ni, shara shagu na amyu bawsang shagu a matu shangai wa ai ngu ai hpe Mahte ahkyak shatai tsun da ai hpe mu chye saga ai.
Dai ni na Kabu Gara Shiga hta masum lang ngu na shadan dan ai lam hpe mu lu ga ai. Shawng de shadan dan ai lam lahkawng gaw Yesu shangai wa ai hte matut mahkai nga ai raitim, ndai masum ngu na shadan dan ai lam gaw grai na ai hpang, Yesu shawa masha ni hte nga hpang wa ai aten hta rai nga ai.
Yesu hpe hpa majaw kashin kamun jaw ra ai kun?
Yawhan baptista a lata hta, Yesu hpa majaw baptistma hkam ra ai ngu ai hpe anhte myit yu na re. Yawhan gaw Yesu hpe tsun wu ai. Ngai gaw nang kaw na mahtang baptistma hkam la ra nngai, nang ngai hpang de sa n ni? Yawhan hkam ya nga ai baptistma gaw, shanhte a yubak mara ni a matu myit malai lu ai kumla hku nna, shanhte a prat hpe galai shai mayu ai myit hpe madun dan lam galaw nga ma ai.
Karai Kasang a Kasha Yesu gaw ndai lam hta lawm na kun? Ndai ga san a shawng nnan na mahtai gaw, Yesu dai hku galaw ai shaloi, shi a shinggyim prat hpe madun dan nga ai. Shanhte yubak mara kap ai wa hku n re ai sha, shinggyim masha langai hku nna shi hkum shi chye na ai majaw re.
Kashin Kamun hte namman chya hkam ai
Daw Lahkawng Kasa Laika hta, Petru gaw Kasa ni a lata hta shawng nnan kashin kamun hkam la ai maigan masha Korneli hpe hkaw tsun ai mungga hta tsun da ai gaw: Karai Kasang gaw Nazaret mare na Yesu hpe chyoi pra ai Wenyi hte mung, n-gun atsam hte mung chya ya wu ai...
Yesu hpe Yawhan kashin kamun jaw ai mabyin hta, namman chya ai lam gaw hka hte rai nga ai. Petru tsun ai Karai Kasang Yesu hpe namman chya ya ai lam gaw, Yesu hpe Hkawhkam hte Madu shatai nga ai hpe tsun mayu ai rai nna, Hkawhkam ni hpe sau hte namman chya ya ai hpe tsun mayu ai. Anhte shi hpe jaw ai ‘Hkristu’ [Grik hku, Christos] ngu ai mying gaw, ‘Namman chya hkam ai wa’ ngu ai lachyum rai nna, Hebre ga hku Meshia ngu ai ga si hte bung nga ai. ndai lam gaw, Yesu shi a shawa prat hpe hpang wa ai shaloi, shi a matu ‘missioning’ galaw ai lamang mung rai nga ai.
Tinang a kashin kamun
Hpang jahtum anhte hkum nankashin kamun hkam ai lam a lachyum hte Yesu a baptistma hkam ai lam hte gara hku matut mahkai nga ai hpe myit sumru yu yang, dai ni anhte a matu akyu rawng na re. Kashin Kamun Sakramentu a akyu ara hpe “npawt nhpang yubak mara hpe kashin kau ya nna Karai Kasang a kashu kasha ni shatai wa ai” ngu ai hpe chye nga ga ai. Law malawng gaw, ma kaji aten hta kashin kamun hkam la ai ni gaw, shanhte tsun shaga na ahkang n nga ai sak hkrung lam hta shanhte hpe gyit da na matu, kanu kawa ni kaw nna shanhte hpe hkan sa shangun ai, kalang sha galaw ai htung lailen langai zawn mu mada chye ma ai.
Masha ni gaw, “Oh! Ngai gaw Kahtawlik hpung masha hku n shangai wa ai rai yang kaja na re!” Teng man ai hku myit sumru ngut ai hpang, masha nkau mi gaw shanhte a matu grau lachyum nga ai ngu hkam la ai sak hkrung lam hpe ra sharawng nna, Kahtawlik makam masham hpe kau da na hpe lata la ma ai. Raitim, marai langai ngai gaw anhte a kashin kamun hkam ai lam a lachyum hpe tup hkrak chye na ai rai yang, dai zawn byin wa na n rai nga ai.
Kashin kamun hkam ai gaw, Sakramentu yawng hta, kalang sha hkam la mai ai re. Ma kaji aten hta hkam la ai rai tim, kaba ai aten hta rai tim, madung gaw, Hkristan hpung kata de, ‘em-bodied’ byin wa ai lam rai nga ai.
Anhte gaw—passive hku n rai, active hku—Hkristu a Hkum hkrang hta lawm ai ni tai wa ga ai. Anhte ra sharawng ai hte nhtan shai ai hku shanhte hpe shadut ai lam galoi mung n mai galaw ai. Dai majaw, asak kaba sai ni a matu, kashin kamun hkam la ai aten du hkra, galu kaba wa ai npawt nhpang lam nga ai rai nna, kashin kamun hkam la ngut ai hpang, wuhpung wuhpawng kaw nna madi shadaw ai lam hpe matut galaw sa wa na hpe myit mada nga ga ai.
Dai shaloi, teng sha, Yesu zawn, anhte a kashin kamun hkam ai gaw, anhte a makam masham hpe ga hte kasi ningli hku nna kaga ni hpe tsun dan na matu, ahkyak ai lit lu ai. ‘Anhte a wenyi hpe hkye la ai’ hte ‘yubak mara n kap ai prat hpe woi awn ai’ hta lawm nga ai.
Anhte gaw kabu gara shiga a hkrung nga ai sakse ni tai na matu, mungkan ga a ga sau tai na matu, bum ntsa na mare langai mi, grup yin nsin kata hta nhtoi htoi tu ai wan shadaw tai na matu shaga la hkrum ga ai. Anhte gaw, Karai Kasang a Mungdan hpe gawgap ai hta, anhte a Hkristan hpung kata na kaga ni hte rau jawm galaw na matu shaga la hkrum ga ai. Yawn hpa gaw, Kahtawlik hpung masha law law gaw, Laban shani na nawku hpung a missa hkungga hta, langai hte langai tsep kawp n chye ai zawn galaw nga ai hpe mu ai shaloi, ndai lam gaw teng sha byin nga ai hpe myit yu mai nga ai !