RVA-Jinghpaw Mu/Na Lamang hpe hkap yu, madat la nga ai nu wa hpunau ni yawng e, Magrau Grang ai Myit hpe jaw ya ai Karai Kasang a chyeju hte hpring nga myit ga law.
Hkrit tsang ai gaw ndai dinghta ga ntsa, anhte a sak hkrung pra tup hpe ka-up da ai lam rai nga ai. Raitim, Wa Ka rai a lam gaw grau kaja nga ai. Shi gaw, shi a tsawra myit hte anhte kaw na hkrit myit hpe shaw kabai kau nna, magrau grang ai myit hte hkawm sa lu hkra atsam jaw mayu nga ai.
Tsaw htum ai Karai Wa a kasha langai mi hku nna, na a wunli kumhtaw gaw myit gwi ai, n hkrit n tsang, magrau grang ai prat rai nga ai. Karai Wa gaw nang hpe hkrit tsang shangun ai lam ni hpe nang kaw na shaw kau ya nhtawm, shi a mungga a tengman ai lam hta ru jung ai magrau grang myit hpe bang ya mayu nga ai.
Daini gaw, na a myit hte salum hpe hpaw nna, hkrit tsang ai, n shim dum ai hte myit ung ang ai lam ni nga ai shara ni hpe shamai shatsai galai shai kau ya ai hpe hkam la u.
Na a prat hta kabu gara ai, shim lum ai, n hkrit n kang ai sha sak hkrung hkawm sa lu na matu – Karai Wa nang hpang de shang wa na ahkang jaw, hkap tau la u. Shakawn Kungdawn Laika, daw kaba hkun-sanit, kaji shi -mali (27:14) hta dai hpe tsun da nga ai.
“Yahwe hpe myit mada nga u;
Dakan nga nna, na a myit dakring nga u:
Rai sa, Yahwe hpe myit mada nga u ga law.”
Bai, Karai Wa gaw anhte a magrau grang ai lam a npawt nga nga ai hpe Esaia, daw kaba malishi-masum, kaji lahkawng hte masum (43:2-3) hta tsun da ai:
“Nang hka rap wa yang, ngai nang hte rau rai nga nngai;
Hka nu hka shi ni hpe rap wa yang, lim wa na n rai;
Wan hpe kabye yang, hkru na n rai, wan shinglet mung galip na n rai.
Kaning rai nme law, ngai gaw, Nang hpe Hkye hkrang la ai Madu,
Israela a Chyoi Pra ai Wa, Na a Karai Kasang rai nga nngai:
Na a gawng malai Hkusha hte Seba mung hpe mung,
Ngai jaw ni ai.”
Sumsing lamu na, na Kawa gaw nang hte rau arai nga ai; nang hpe galoi mung n kau da ai. Masa lam shagu hta – ru yak lam ni, manghkang ni a lapran – nang n-gun atsam, magrau grang let, simsa ai myit hte lai di lu na masing shi hta nga nga ai. Yawhan a Shagun Laika langai, daw kaba mali, kaji shi -matsat (1 Yawhan 4:18) hta:
“Tsawra ai myit hta e hkrit kang ai myit n rawng lu ai;
Hkrit kang ai myit ari hkrum nga ai majaw, hkum chyip re ai tsawra myit gaw, hkrit kang ai myit hpe shaden kau wu ai:
hkrit kang nga ai wa chyawm gaw, tsawra ai myit garai n hkum lu ai” nga nna tsun da nga ai.
Mungkan a masu hkalem ai hte shut ai ningmu ni, anhte hpe hkawhkam kasha ni a prat, sak hkrung lam ni kaw nna lamshe de woi sa ai shaloi,Madu a Wenyi gaw, tangman ai lam hpe tsun madun ya ai. Dai lam ni hpe Shi a mungga gaw anhte hpe aten tup shadum jahprang ya nga ai.
Roma ni hpang de shagun ai Laika, daw kaba matsat, kaji shi-manga (8:15) hta:
“Bai hkrit kang na matu, mayam a wenyi hpe nanhte hkam la manit dai n rai: Aba, Wa e, nga nna jahtau chye ai, yin la ai kasha a wenyi hpe she, nanhte hkam la manit dai” nga nna Kasa Pawlu shadum da ai.
Madu Yesu si hkam ai a marang e, Wenyi nnan hpe anhte bai hkam la saga ai. Dai Wenyi hta anhte gaw – masha nnan, pandun nnan, mu jut nnan hpe hkap dagraw la saga ai.
Anhte gaw, ndai dinghta mungkan a mungchying sha ni n rai saga ai majaw, de a n grin ai lam ni rai nga ai – myit hta hkam sha lam ni, hkrit tsang ai, ung ang ai, n shim lum ai lam ni a npu e ntaw nga ra saga ai.
Ya, nang gaw, yawng mayawng hpe dang chye, dang di lu ai, nga yawng nga pra hpe hpan tawn da ai Tsawra dik ai Hpan Madu a tsawra ai kasha rai nga nit dai.
Bai, Shakawn Kungdawn, daw kaba sumshi-mali, kaji mali (34:4) hta Dawi gaw:
“Ngai Yahwe hpe tam nna, shi ngai hpe htan ya ni ai;
Hkrit gari ai nlang the hta na, shi ngai hpe mawai la nngai” nga nna ka da nga ai.
Nang mung, Dawi zawn, na a sumsing lamu a Kawa a myi man hpe tam mu nna, shi a salum de sit shang let, shamai shatsai hkye mawai la ai hpe hkam la u; nang hpe aten law law wa gyit hkang da sai hkrit tsang ai, n shim lum ai lam ni kaw nna shi nang hpe shalawt da mayu sai.
Akyu Hpyi Ga
- Karai Kasang a kasha langai mi hku nna, nang hkam la gying ai Sali wunli kumhtaw hpe myit dum u. Yesu Hkristu hku nna anhte lu la ai magrau grang ai hte shim lum lam hpe na a myit hta nnan bai shagrin u.
Lahkawng Timoti, daw kaba langai, kaji sanit (2 Timoti 1:7) hta:
Karai kasang gaw hkrit chye ai myit anhte hpe n jaw mi ai; n-gun lagaw rawng ai myit, tsawra chye ai myit, si si nga chye ai myit she jaw mi ai” nga nna Kasa Pawlu tsun da ai.
- Na a prat hpe bai nhtang myit sumru yu u. Kaning re ai masa lam ni gaw nang hpe hkrit tsang shangun, n shim lum shangun ai kun?
Kadai wa, kaning re ai mabyin ni, masu ai lam ni gaw nang hta hkrit ai wunma hpe shabyin ya sai kun?
- Karai Kasang a man e ban sa la u; shi a tsawra myit gaw nang kaw na hkrit tsang ai myit hpe la kabai ku ya nna, tengman ai hte magrau grang ai chyeju bang ya u ga.
Yawng, Chyoi Pra ai Wenyi kaw na n-gun atsam, magrau grang ai, simsa ai chyeju hpe hkam la lu myit ga law.
