Daini na Ja Chyum Mungga hpe hti sumru yu ai shaloi e, hkum katsing si ai wa hpe Yesu shamai ya ai lam na lu ga ai. Lagaw lata si ai wa hpe Madu Yesu tsi lajang ya ai mahkrum madup kaw na, shut hpyit mara hte ana zinli ni a lapran hta, mara raw ya ai hte ana ahkya mai tsai wa lu ai lam ni a lapran hta, matut nga ai lam hpe sang sang lang lang chye madat lu nga sai. Ya daini e masha law law hkam sha nga ai ana ahkya ni gaw, shainggyim mashani a ladu lai hkam sha lam ni a majaw re ngu hkam la ra na sha rai nga ai. Ndai mabyin hpe yu yu ga nga yang e, mara n raw ya lu ai lam ni, n ju n dawng ai lam ni, ladu lai pawt sin dawng ai hte dai shut hpyit mara ni gaw, yawga a na byin wa na lam a ningpawt nan rai nga ai.

Madu Yesu a aten hta, shut hpyit mara ngu ai gaw, ana yawga byin na lam a madung re ngu hkam la chye ma ai. Dai re majaw Madu Yesu gaw hkum katsing si ai ni hpe na a mara hpe shawng raw dat hkyam sa ya sai ngu tsun ai rai nga ai. Dai zawn Madu Yesu tsun ai gaw, Shi hta e mara dat kau ya lu ai Karai atai nga ai ngu ai hpe tsun madi madun ai lam nan re. Bai machyi ai ni hpe shamai shatsai ya ai mung Madu Yesu shi gaw Karai Kasang nan re ai hpe mung sakse hkam ai re. Shingrai anhte hkum nan mung Madu Yesu a shamai ya lu ai tsam dagu hpe hkap la kam sham nga ga. Madu Yesu e anhte hpe tsi shamai ya rit. N kaja ai lam mahkra hta na anhte hpe hkye mawai la rit. Anhte hpe shut hpyit mara mahkra hta na koi yen kau lu na chyeju jaw ya rit ngu ya sha ya sha tsun na ahkyak nga ga ai law.