Daini na Ja Chyum Mungga hpe hti sumru yu ai shaloi e, Lu sha gam ai hte seng ai lam ni hpe na la lu ga ai. Kasa yawhan Baptister a ma ni hte Hparishe ni gaw, Mesia Hkyela Madu du sa na hpe ala taw nga ai ni re majaw, lu sha gam na ra nga ai. Raitim mung Mesia Hkyela Madu du hpang hkan ai Kasa ni gaw, lu sha gam na n ra ma ai. Hkungran poi de sa lawm nga ai ni gaw, dai poi hta manang ni hte kabu gara ai hte lu sha pyaw nga ai poi n rai a ni? Madu Yesu gaw dai shi hkum nan Hkyela Madu Mesia rai nga ai hpe madi madun ya ai. Shi gaw Kabu gara shiga hkaw tsun ai. Ana yawga lu ai machyi ai ni hpe shamai shatsai ya ai.

Bai Nat sandan hpe gawt shapraw kau ai. Ndai zawn re ai mau hpa lam ni hpe tsun dan tim, dai ten na masha ni a myit masa bawnu atsam marai ni gaw, n dang hkan dep nga ma ai. Sabyi ntsin bu dingsa zawn, Madu Yesu a ningnan rai nga ai galaw sa wa ai lam ni hpe n chye madat ai. N hkap la lu nga ma ai. Dai re majaw, Hkyela Madu Mesia hpe mu mada hkap la lu na matu, shi a galaw sa wa ai mai kaja lam ningnan ni hpe hkap la lu na matu gaw, shanhte a myit dingsa hpe galai tawn kau da nna, myit nyan marai ningnan, sabyi bu ningnan ni hte nga sa chye ra ga ai. Shiga madat nang ngai mung Hkyela Madu Yesu hpe ngu tup hkrak hkap la nga ga ai kun? Madu Yesu chyu sha anhte a Hkyela Madu Mesia rai nga ai ngu ai hpe hkap la let, shi a kaja ai hpang hkan ai ni tai let, makau grup yin ni hta sakse hkam nga ga law.