Daini na Ja Chyum Mungga hpe hti sum ru yu ai shaloi e, Laban Nhtoi a Madu re ai lam na chye la lu ga ai. Madu Yesu a Kasa ni shat kraw si ai majaw, mam si di sha ai hpe mara tam n na, Hparishe ni Madu Yesu hpe tsun jahpyak na matu lam tam nga ma ai. Shingrai dai mabyin lam ni hpe lakap nna, Madu Yesu gaw shanhte hpe tsun ai, laban nhtoi a tara u padi hte kaga kaning re ai ritkawp tara u padi ni mi raitim, shinggyim masha a matu nga pyaw ai hte hkawm sa lu na matu yaw shada let lajang da ai re lam hpe David Hkawhkam a galaw sa wa ai sat lawat hte ga shadawn da nna, tsun sang lang dan ai lam gaw, grai mau na zawn rai nga sai re.

Ndai ritkawp tara hkan ai shaloi masha langai mi a matu, mai kaja na lam hte akyu rawng hkam sha na matu hpe chyu sha madung da let, myit sawn sumru galaw sa ra ai lam Madu Yesu shanhte hpe sharin ya sai rai nga ai. Tinang a htung tara ni hte maren ritkawp tara hpe hkan lang hkan sa ai hta Hparishe ni gaw U padi a tara hta jan nna, ladat n jaw ai hku hkan sa galaw taw nga ai ladat ni hpe Madu Yesu gaw ninghkap tsun jahpra ya sai. Dai zawn sha anhte mung, Nawku hpung hta hkan sa tara ni, shinggyim a hkan sa tara ni, wuhpung wuhpawng, mungdan a hkan sa tara ni, jawng a hkan sa tara lam yan ni yawng gaw, anhte a myit kraw kata hta, wanglu wang lang pyaw ngawn ai hte hkan sa nga pra na matu rai nga ai.

Dai ni hti na Madu a kabu gara shiga gaw,

MK 3:1-6 (1-5) January 21. laban Bat 3 ya shani rai nga ai. Hkristu hta Tsawra ai Nu Wa hpu nau ni, daini na Ja Chyum Mungga hpe hti sum ru yu ai shaloi e, Lata katsing si ai masha a lam na lu ga ai. Lata katsing si ai wa hpe laban shani hta tsi shamai ya ai majaw, Madu Yesu gaw laban shani a madu re ai lam hpe sakse madun dan nga ai. Raitim shi hpe mara hta na matu gyam nga ai ni gaw, Madu Yesu hpe laban ninghtoi a tara tawt lai ai wa ngu shadu ma ai. Tara U bade hpe tup hkrak hkan sa na matu chyu sha myit tsang taw nga ai majaw, Hparishe ni gaw machyi hkrum nga ai wa hpe laban shani hta madun dan ai Karai Kasang a tsawra matsan dum lama ai lam hte chyeju ni hpe n mu lu ma ai.

Karai Kasang a lam hta kam sham ai hpe mying la nga ai Hparishe ni gaw, Karai Kasang hte seng ai lam hte shinggyim masha ni a mayak mahkak lam ni hpe n lu hpa ran ya kau ma ai. Laban ninghtoi hpe hkungga lara chye na lam ladat hpe tup hkrak hpe Madu Yesu gaw Laban shani e nan shanhte hpe sharin ya ai lam rai nga ai. Shingrai Madu Yesu nan sharin ya ai majaw, anhte mung laban shani hpe gara hku thing hkan sa ra na lam chye madat la lu ai rai nga ai. Dai majaw Madu Karai hpe madung da kam hpa ga ai zawn, shi Madu a tsawra matsan dum ai lam hpe, ra kadawn nga ai ni hpe mung, garum madi shadaw ya na grai ra ahkyak nga ai majaw ta tut hta, anhte yawng mung hkan sa galaw shakut sa ga law.