Wa Saradaw John Mung Ngawn La Sam A Mungga;
Madu Yesu mungkan ga de yu wa ai gaw masha hpe je yang na matu yu wa ai n re, masha law law hpe hkye hkrang la na matu, yubak mara kaw du nga ai ni hpe mawai la na matu, mara dat ya na matu shi yu sa ai re.
Dai re majaw anhte nanhte mung, mara kaba lu wa yang hkum hprawng mat mu,Madu Yesu Karai Kasang hpang de grau nna sit shang u, grau akyu hpyi u, grau Rosary hti shakut u.
Karai Kasang mungkan ga de yu sa ai gaw anhte hpe mara dat ya na matu anhte hpe hkye hkrang la na matu yu sa wa ai re, dai hpe galoi mung hkum malap.
Karai Kasang gaw mara dat ya n jin ai, matsan dum tsawra n jin ai Karai Kasang re.
Anhte mara kaba ni lu wa ai aten hta Karai Kasang hpang de anin shang wa ai shaloi Karai Kasang anhte hpe mara dat ya nna grau nna shaman chyeju jaw ya nga ai.
Jubilee Madu A Nsen;
Daini Karai Kasang a magam gun ai ( 25 ) ning hkam la lu ai ngu ai gaw ngai a matu ninggun tsi kaba kalang bai bang ai re ngu nna hkam la ai re.
Dai hte maren lai wa sai ahkying aten hta ap nawng ai hta grau nna daini kaw nna ap nawng ai magam bungli hta aten lu jaw hkra ngai shakut na re ngu myit daw dan ai.
