Daini na Ja Chyum Mungga hpe hti sumru yu ai shaloi e, Yesu a matsan dum myit hpe na la lu ga ai. Galile hte Yuda mung shara shagu na masha wu nawng wu wa ni, shamai shatsai hkam la lu na matu, Madu Yesu kaw ni htep sa wa ma ai. Madu Yesu gaw kaga tsi du, tsi sara ni hte n bung nga ai. Lak lai ai Karai Kasang a hpung dagu atsam hte tsi shamai ya ai raitim, Madu Yesu hpe Mesia Hkyela Madu hku na n lu mu mada nga ma ai. Raitim masha ni kaw kap ai Nat tsa dan pyi Madu Yesu kadai re ai hpe mu chye lu ma ai. Madu Yesu hpe Mesia Hkyela Madu hku na n mu mada, n hkap la ai raitim, Madu Yesu gaw, shanhte a yawga a na zinli ni mahkra hpe tsi shamai ya sai.

Shingrai lam mi hku yu ga nga yang, masha ni gaw, tingkyeng myit jasat hte sha tinang ra ai lam hpe sha lu hkra nga Madu hpe sa tam ai ni rai nga ma ai. Raitim San pra ai masha ni gaw, tinang ra ai a matu chyu sha n re, Madu Karai Kasang hpe chye mayu ai. Shi madu hpe hkau chyap mayu ai myit ni a majaw, mu mada mayu ai myit hte Karai Kasang hpe tam ai ni rai nga ai. Anhte mung San pra ai masha ni zawn, Karai Kasang hte grau hku hkau mayu ai. Bai grau n na Karai hpe chye mayu ai myit hte shani shagu na galaw sa ai magam bungli, tsun shaga matut mahkai gun hpai sa ai lam yan ni mahkra hpe, Karai Kasang a man hta, Karai Kasang a matu galaw shakut gun hpai nga ga law.