Wa Sarabyin Leo XIV, shinggyim sari sadang hpe n hkungga ai hte mungkan ting hta n hkru n kaja ai lam ni grau sawng wa ai ndai aten hta, Hkristan kahkyin gumdin lam hte simsa lam a matu akyu hpyi na matu, kam sham ai hpung masha ni hpe saw shaga dat ai. 21 January, bat masum ya shani Vatican hta nga ai San Pawlu VI Gawknu kaba hta galaw ai General Audience hta ndai hku saw shaga dat ai lam rai nga ai.
Wa Sarabyin gaw shi a (catechesis) makam masham sharin shaga ai hpe hkaw tsun ngut ai hpang Portuguese ga shaga ai kam sham ai hpung masha ni hpe shakram let, “Kawa hpe hpaw shadan dan ai Yesu a shinggyim nga pra masa gaw, tara rap ra lam hte htinglu htinglai lam ni hpe tam sawk sagawn lu na matu karum ya u ga” ngu akyu hpyi ya ai.
Hkristan ni a lapran kahkyin gumdin lam lu na matu hte mungkan ting simsa lam lu la na matu, grau nna January 18–25 ya shani galaw na Hkristan kahkyin gumdin lam a matu akyu hpyi ai bat laman hta, kam sham ai hpung masha ni hpe saw shaga da nga ai.
Yesu gaw Shi n-ni n-kri garai n hkrum shi yang, sape ni a kahkyin gumdin lam a matu akyu hpyi lai wa sai lam hpe bai myit dum let, “Ndai Hkristan kahkyin gumdin lam a matu akyu hpyi ai ndai bat laman, shi a sape ni yawng kahkyin gumdin lam hpe mu lu na matu, mungkan ting Shi hpe kam sham lu na matu hte Shi a hpaw shadan dan ai lam hpe kam sham lu na matu, Shi hte rau akyu hpyi nga ga” nga nna Wa Sarabyin tsun shadut da nga ai.
Ndai Bat laman a ga baw hpe tsun let—“Nanhte hpe shaga la ai myit mada lam langai sha hta shaga la hkrum ai hte maren, hkum hkrang langai sha hte Wenyi langai sha rai nga ai” (Ehp 4:4) ngu ai hpe tsun let, Hkristan ni hpe Madu kaw hpyi nem na matu n-gun jaw ai gaw, “Shi a Wenyi a chyeju kumhpa hpe Nawku hpung yawng a ntsa e jaw ya na matu, mungkan ting hta Hkristan ni chyam bra wa na matu, kahkyin gumdin lam a sumri” ngang ra nga ai.
Ndai bat shawng daw hta, Wa Sarabyin Leo gaw shi a laban shani na Angelus akyu hpyi ai hta, mungkan ting na Kahtawlik hpung masha ni hpe “Hkristan yawng hkum tsup ai, mu lu ai kahkyin gumdin lam a matu ndai nhtoi ni hta grau nna akyu hpyi na matu” saw shaga da ai.
San Pawlu a myit malai lu ai poi hta htung nga ai hte maren, Wa Sarabyin Leo XIV gaw, shana de hkying 5:30 p.m. hta San Pawlu Nawku Htingnu a shinggan hta “Evening prayer” shana maga na akyu hpyi ga tsun na re lam hpe chye lu ai.
