Daini na Ja Chyum Mungga hpe hti sumru yu ai shaloi e, Sape shi lahkawng hpe Yesu shangun dat ai lam na lu ga ai. Madu Yesu gawKasa shi lahkawng hpe shi hte nga na matu hte, shi a kabu gara shiga hkaw tsun gat hkai sakse hkam na matu shaga lata da nu ai. Shinggyim masha langai hte rau nga na matu gaw, yak hkak ai lam langai mi mung rai nga ai. Dai hte maren sha, Madu Yesu hte rau nga na matu shi hte rau myit masin hkum hkrang langai sha rai lu na ra nga ai zawn, shi a tsun sharin shaga ai lam ni mung tup hkrak hkan sa na rai nga ai. Bai shi a lam hte kabu gara shiga hkaw tsun gat hkai na matu mung lit magam langai mi bai rai nga ai.

 Hpa majaw nga yang, ndai mungkan a matu Madu Yesu a mungga gaw, myit sawn da ai ningmu ni hte kaga ga rai taw nga ai majaw re. Shaga la hkrum ai Karai magam gun Jau mama ni sha n rai, kashin kamun hkam da sai anhte hkristan ni yawng mung, Madu Karai hte arau nga na matu, saw shaga da hkrum ai ni rai nga ga ai. Dai majaw Madu Karai hte arau nga nna, Madu Yesu a myit jasat hpe hkan lang hkan sa let, tinang a prat hkrun lam hta sak hkrung nga sa nna, Madu a matu sakse hkam nga ga law. Shaloi jang kasa ni a magam hta shanglawm gun hpai ai ni anhte rai na ga ai re. Shi a magam hta shang lawm lu hkra mung shani sahgu shakut sa ga law.