Daini na Ja Chyum Mungga hpe hti sumru yu ai shaloi e, Yesu hte Bezebula Nat Du a lam hpe na la lu ga ai. Nat tsa dan hpe gawt shapraw kau lu ai Madu Yesu a shiga gaw grai tsun kabrawng nga ai hpe chyum laika ka ai sara ni chye mat ai shaloi, Madu Yesu kaw Nat tsadan kaba wa shang nga ai. Dai Nat tsadan garum ai majaw, masha ni kaw shang ai tsadan ni hpe dang kau lu ai nga nna, tsun jahpyak ma ai. Shaloi e Madu Yesu gaw shanhte a tsun jahpyak ai lam n teng man nga ai hpe ga shadawn ni hte bai htai ya ai. Shanhte dai zawn tsun jahpyak ai gaw Chyoi pra ai wenyi hpe nan shut ai mara re majaw, Karai Kasang mara nlu dat ya ai re hpe ja ja tsun shadum nga ai.

Shingrai ji woi ji wa ni kaw na byin pru wa ai n re ai, myit sawn sumru yu na mung yak hkak la ai mabyin ni hte hkrum wa ai shaloi, tsun shatan nga na malai tengman ai lam hpe hkap la chye na matu sharin ya ai. Kata lam pu pu le le n chye ai sha, ntsa lam sa yu nna mara shagun ai lam gaw, masha wa hpe grai nan hkra machyi ai hte dai masha wa hpe lam madun ya nga ai chyoi pra ai wenyi hpe mung shut ai mara lu ai wa mung re. Dai majaw shiga madat ni anhte yawng mung, masha ni hpe aloi ali hte sha daw dan mara shagun tsun jahpyak chye ai ladat hpe koi yen let, teng man ai lam hpe hkan tam nna shani shagu na sak hkrung hkawm sa ai lam hta kaja ai hku hkan sa shakut sa nga ga law.